Police lover - Gula 4

“Unsa diay sala nga nahimo ni Jack sa inyong grupo Bert nga nasuko ka man kaniya?” gipangutana ni Tina ang suki niya’ng kustomer.

Wala motubag si Bert sa pangutana kaniya ni Tina. Giyarok ni Bert ang usa ka botelya nga beer. “Pwede ba og makigdeyt ko nimo karong gabhiona Tin? Mobayad ko’g bar fine bisan pila ang pangayoon nila basta magkadeyt ta,” ni Bert pa.

Dugay na nga si Bert nagsigi’g hangyo nga magkadeyt sila si Tina apan kanunay usab siya nga gibalibaran sa dalaga. Karong gabhiona, mapugsanon na si Bert nga dad-on gayud niya ang dalaga.

“Bayran nako ang bar fine para nimo,” matud ni Bert nga midayon pagtindog ug miadto sa counter. Nakita ni Tina nga gipakigsultihan ni Bert si Wendel nga tag-iya sa bar.

Gikamay ni Wendel si Tina. “Tin, ubani lang ni si Bert. Dia gibayran na niya ang bar fine. Five thousand ang akong gipangayo og imo ang P3,500 ani,” matud ni Wendel.

“Dili ko sir uy. Bahala na og wala ko’y trabaho. Nahibalo ko’g unsay iyang tuyo nga makigdeyt nako,” matud ni Tina. Mibiya dayon si Tina kay nakasabot siya nga nasuko na usab si Wendel.

Suod kaayo nga higala si Wendel ug si Bert. “Tin, nakadungog ra ba ko nga mibahad g’yud kanang lalaki nga dili g’yud siya mobiya nga dili ka niya ikauban,” giingnan si Tina sa usa ka waiter. Gipanguyawan na si Tina. Wala siya masayod unsay iyang buhaton. Maayo mohatag og tip si Bert apan nasayod na siya sa iyang dangatan kun ubanan niya si Bert.

Wala na g’yud mosayaw pa si Tina. Didto na lang siya naglingkod sa daplin, naglibog kun unsay iyang buhaton. Nabantayan niya nga si Bert adunay gikaestorya sa iyang selpon.

Lain na kaayo ang pamati ni Tina, gikulbaan siya. Nakahuna-huna siya nga teksan ang iyang inahan aron magpakuha siya sa bar. Gikuha ni Tina ang iyang selpon sa bag.

Diha pa nabantayi ni Tina nga adunay nag-text kaniya. Wala kini marekord sa iyang phone book. Si Jack diay maoy nag text ug nagpasalamat nga gilibre siya og beer. Nakahuna-huna si Tina nga mangayo’g tabang ni Jack aron malikayan nga magmalampuson si Bert sa dautan niini nga laraw batok kaniya.

Iyang giteksan si Jack ug gipahibalo nga nanginahanglan siya og tabang. Wala madugay, mitawag si Jack kang Tina. Gitug-anan ni Tina si Jack nga adunay iyang kustomer nga pugson gayud siya nga makigdeyt. Gitug-anan usab ni Tina si Jack nga ang maong tawo naghambin og kasuko kaniya kay matud pa nakasala sa ilang grupo. - Sumpayan