Nanghupaw si Noy Buloy

Kun unsay imong gipugas, kini mao ang imong anihon. Ang gibuhat sa kaayo, molipang, mosalingsing, mamunga og kaayo. Lahi kini kun buhat binilyako ang himoong sentro, dili masabot, dili ka makatuo sa mahimong epekto.

Tingog sa babaye nadungog sa selpon.

“Hi Noy Buloy! Gusto kong makigkita ug makig-istorya nimo. Ikaw man gud ang amahan sa akong usa ka bata. Nakuha ko nimo sa pagsige nimo nako og ‘tingin’.”

Sagol tinagalog ang mga pulong nga nabati ni Noy Buloy, ang numero unong tsiks killer sa Junquera.

Natingala si Noy Buloy:

“OMG! Ikaw si Ashley?” gipanugkan og kahinam si Noy Buloy.

“Dili.”

“Margita?”

“Dili.”

“Condessa?”

“Dili.”

“Carlota?”

“Dili!”, nahasinta ang tingog nga nabati ni Noy Buloy.

“Si Noy Buloy oi! Ako ni ang tindera ba sa tubaan nga imong pangayuanan og “pakapin”. Si Benigna Bangkiyod gud. Labingly yurs truly gyud ko nimo. Nalimot ka? Nahutdan ko’g bahal, pero imo gyud kong gipangayoan.

Natagaan gyud nuon tika og “yakapin”. Hubog kaayo ka Noy Buloy pulong pa nimo gigwapahan ka nako, maong mituo ko nimo bisan pa’g dagko og kabhang sa pangag ning akong ngipon sa pagsige’g yumyom og tuba, pung pa nimo kaya ko nimong “tiisin”?”, paraygong pamulong sa babaye.

“Unsuwaa. Ayaw pataka og sulti ha! Sagol tinagalog ra ba ka. Nangilad ka,” napikal si Noy Buloy.

“Sus nakapuyo ko’s Manila eh Noy Buloy. Kun dili ka motuo, dia ra ba sa tindahan imong asawa. Isumbong tika para ‘tiwasin’ ka dinha,” dala bahad sa baye.

“Ngeeek? Hala sige na lang oi. Mosugot na lang ko nga imong “aswangin”. Delikado na kaayo og sa sundang sa akong asawa kitang duha iyang tigbasin”. Daw sa napus-an sa pughak si Noy Buloy. Huyhoy.

Nanghupaw si Noy Buloy. Mipauli sa iyang lawas ang kalihokan niyang “motingin” sa mga babayeng nagpangita og linuklok niyang “lingin”. (Kataposan)