Kapit patalim

Gula 4

“Dili g’yud nimo makaya ang among paagi sa pagmasahe Grace?” gipangutana ni Gina ang amiga. “Dili ko makahimo niadto Gin uy. Kalaw-ay kaayo adtong akong nakita sa hulagway nga gipakita sa manager,” matud ni Grace.

Mipahiyom si Gina. “Sige, ikaw gud. Apan sa akong giingon, dagko og kita ang mga masahesta diha kay daghang mga langyaw ug bisan mga Pinoy nga moanha sa gabii kay magpa-lingam,” ni Gina pa.

Bisan didto na si Grace sa ilang balay, wala mahanaw sa iyang huna-huna ang trabaho nga buot pasudlan ni Gina kaniya. Unya, nadungog ni Grace nga naglalis ang iyang amahan ug inahan didto sa silong.

Iyang gipaminaw. Nadungog ni Grace nga ang giawayan sa iyang mga ginikanan mao nga wala na sila’y bugas. Nakapangagho ang dalaga. Gitan-aw niya ang ATM slip sa kataposan niya nga pag-withdraw.

Kapin na lang sa P5,000 ang nahabilin nga kwarta ni Grace sa banko. “Ayaw na mo pag-away ma. Molakaw usa ko aron duna ta’y makaon sa paniudto,” matud ni Grace dayong lakaw paingon sa ATM booth sa unahan.

Pagbalik ni Grace gitunol niya ang tibuok usa ka libo ka pesos sa iyang inahan. Nagsugod pagsipok ang ulo sa dalaga nga nagkahurot na g’yud ang iyang kwarta.

Mihigda si Grace ug gipiyong ang iyang mga mata. Taud-taud, misantop sa iyang huna-huna nga mosulod na lang g’yud sa pagka masahesta didto sa gitrabahoan ni Gina.

Giteksan dayon ni Grace ang iyang amiga. Nagkasabot sila nga magkita mao nga giadto niya si Gina sa iyang gipuy-an sa Barangay Kalubihan, duol ra sa downtown area.

“Maayo kay nakahukom ka na g’yud day nga magmasahesta. Sa imong kagwapa sigurado ko nga kusogan ka nga mora unya’g hot cake ug makakwarta ka’g daku,” matud ni Gina. Gipasabot si Grace ni Gina kun unsay iyang himoon. “Hapyud-hapyod ra nimo kadiyot ang buko-buko sa kustomer day, unya inig hayang niya, nahibawo ka na og unsay sunod mo nga buhaton,” ni Gina pa nga nagpahiyom.

Tuod, miuban na si Grace kang Gina pag-adto sa Lingam Massage sa Barangay Kasambagan pagka-gabii. Naka-kustomer g’yud dayon si Grace apan gihilasan kaayo siya sa iyang gihimo.

Giluom lang ni Grace ang tanan kay unsaon nga nanginahanglan siya’g kwarta.

Nakabantay si Grace nga giganahan ang iyang kustomer sa tanto niya nga pagmasahe sa pribadong parte sa iyang lawas.

Daku g’yud tinuod og tip nga gihatag ang mao nga Koreano pagkahuman na og masahe ni Grace. Nakamasahe pa si Grace og tulo pa ka kustomer, apil ang usa ka hamtong nga Pinoy nga mihatag kaniya’g dako nga tip. - Sumpayan