Wala motug-an

Dear Tita Salie,

Maayong adlaw ug hinaot nga imong kahatagan og kasulbaran ang akong problema nga dugay na nakong gidala. Tawga lang ko og si Ms. Taurus, usa ka dalaga apan duna nako’y anak. Dili gyod lalim ang gidangatan sa akong kinabuhi, Tita. Nahigugma ko sa usa ka lalaki ug nga tungod sa akong dakong gugma akong gihatag kaniya ang tanan lakip na niini ang akong pagkababaye.

Wala magdugay, Tita, nabuntis gyod ko. Ug dihang nabuntis nako hinayhinay nausab ang iyang tinagdan kanako ug masabot na nga wala siyay plano nga atubangon ang iyang responsibilidad diri kanako ug sa among anak.

Dihang hapit nako manganak usa pa siya misulti sa kamatuoran nga duna na siya’y kabilinggan, duna na siya’y pamilya. Sa dihang uyab pa mi wala gyod siya mosulti nga minyo diay siya. Iyang giguba ang akong kaugmaon, Tita.

Karon nidako na ang among anak ug wala gyod siya mohatag og support sa among anak. Puyde ba ko makapugos kaniya pagpasuporta sa among anak, Tita? Unsa may akong buhaton? Palihog pasabta ko. Daghang salamat and more power!

* * *

Dear Ms. Taurus. Pagkasalbahis pod niining imong nahimo nga boyfriend. Kun atong tan-awon pag-ayo ang iyang gibuhat kanimo mora gyod og nangilad siya kanimo tungod kay wala man gyod siya mosulti kanimo sa tinuod niyang kahimtang ulahi na ang tanan dihang iya kang gisultihan.

Manghinaot lang ko nga ang imong kasinatian makuhaan unta og pagtulon-an sa uban. Tungod daghan kaayo sa atong mga batan-on karon dali ra kaayong mosalig sa ilang uyab ug ihatag dayon ang kaugalingon. Aduna  pay uban nga wala masayod sa apilyedo sa lalaki pero uyab na sila ug duna nay nahitabo kanilang duha. Busa ako naghangyo sa mga kababayen-an nga palihog magtinabangay kitang tanan nga mausab unta ang atong imahen nga atong giguba kay sa tinuod lang kita ra usab ang may sala kun nganong wala nay respeto ang mga lalaki nganhi kanato.

Apan anaa kana sa maong sitwasyon, busa, wala kanay laing mahimo gawas sa pag-atubang niana. Pugsa siya nga motabang sa iyang obligasyon. Kun duna man siya’y trabaho adtoa ang iyang gitrabahoan  ug isumbong ang iyang gibuhat kanimo kun ugaling magmakuli siya sa tabang nga imong gikinahanglan. Aron ang ila nang boss ang maantigo kaniya, and of course, makuhaan gyod ang iyang sweldo kay mapugos man siya pagtabang kanimo. -- Tita Salie