Isla Paraiso - Gula 84

“Nasayod ko nga may kahasol karon sa imong hunahuna, sister Veronica,” ang madre superyor maoy miuna pagsulti aron mabuak ang kahilom nga taudtaod nang mibukot kanila.

Wala motingog si sister Veronica sa atubangan sa madre superyor. Miduko siya. Hangtod niining mga gutloa wala pa gihapon siya’y igsusulti. Ingon sa mihaw-ang ang iyang hunahuna.

“Ayaw sabta nga nanginlabot ako sa pribado mong kinabuhi, sister Veronica,” namulong na usab ang madre superyor. “Apan isip maoy imong superyor dinhi sa kombento, may katungod ako nga masayod kun unsay   suliran nga nagumon karon sa imong galamhan.”

Si sister Veronica nagpabilin sa iyang kahilom atubangan sa madre superior. Nagduko siya samtang gipahit ang ubos nga ngabil. Dihay buot niyang isulti apan dili malibkas sa iyang dila. Daw wala siya makaseguro kun ang buot niyang isulti mao ba gayod ang tukmang malitok sa iyang dila.

“Nakamatikod ako sa masubsob nga pagbisita ni SPO3 Corpuz kanimo dinhi sa kombento,” namulong ang madre superyor taliwala sa kahilom ni sister Veronica. “Nakaseguro ako nga dili mag-usik og panahon kun dili mahinungdanon ang iyang tuyo kanimo.”

Si sister Veronica miyahat ug tul-id nga mitan-aw sa madre superyor.

Apan sa dihang nagkasugat ang ilang tinan-awan, mibalik pagduko ang maanyag nga madre.” -- Sumpayan pa