Isla Paraiso

Gula 82

Atubangan sa altar sulod sa iyang lawak, si sister Veronica nagluhod nga naghilak: “Lord, nasayod ka kun unsa ka dako ang akong tinguha sa  pag-alagad kanimo. Ihatag kanako ang kalig-on. Ipadala kanako ang imong balaang kahayag aron akong masabtan sa hingpit kun unsa gayod ang imong kabubut-on alang kanako. Tawo lamang ako, Lord ug nagkinahanglan sa imong panabang aron dili ako mabuntog sa pagsulay. Apan dili ang akong pagbuot maoy matuman kun dili ang imo.

Tapos makalitok sa iyang pangamuyo, ang madre mibalik paghigda sa iyang kama. Naghunob gihapon ang mga luha gikan sa iyang mga mata.

Niining higayona, bisan makapila na siya mag-ampo nga dili mabuntog sa tawhanong pagbati; apan mopatigbabaw gayod si Rey sa iyang hunahuna. Ingon sa dili na gayod kini malaksi sa iyang kaisipan. Ug iyang nabatyagan nga ingon sa hapit na mogahom sa hingpit sa iyang kaugalingon ang pagbati nga iyang gipakigbatokan. Ingon sa dili na niya kini mapiog!

Pagkabuntag, wala mogawas si sister Veronica sa iyang lawak. Wala gani siya mamahaw. Si sister Belen nga nanuktok sa gawas sa iyang lawak kaganina aron pag-agda kaniya sa pagpamahaw iyang gibalibaran. Nagkulob siya sa iyang kama nga nagmug-ot ang hitsura.

Nianang ikasiyam nga takna sa kabuntagon, may nanuktok sa iyang lawak. -- Sumpayan pa