Misulod si Lando sa usa ka kan-anan sa dalan Colon. Gipili niya nga adto siya molingkod sa suok nga dapit samtang nagpaabot nga ihatud ang gi-order niya nga pagkaon.
Gitagsa-tagsa ni Lando pagtan-aw ang ubang mga nangaon sa fast food store nga iyang gisudlan. Nagkadaghan ang misulod aron mukaon kay tingpaniudto na.
Swerte si Lando nga nakapahimutang na’ng daan sa wala pa manulod ang daghang mga tawo. Samtang padayon nga nagkaon si Lando, iyang nakita ang usa ka tawo nga mikawhat sa bag sa babaye nga naglingkud sa pikas lamesa.
Nataligam-an sa babaye nga abli ang iyang bag ug wala g’yud siya’y kasayuran nga gikuha sa tawo nga naglingkud sa iyang luyo ang iyang selpon.
Nakit-an g’yud ni Lando nga ang selpon nga nakuha sa tawo gikan sa bag sa babaye gidali niini pagsulod sa bulsa sa iyang karsones. Taud-taud, nahasiril-siril na ang babaye kay nangita na sa iyang selpon.
Mitindog ang babaye ug mitan-aw sa iyang gilingkoran apan wala na g’yud niya makita pa ang iyang selpon. “Hala, nawala ang akong selpon nga diri ra man g’yud kadto sa akong bag,†matud sa babaye.
Nakita ni Lando nga mora lang og wala magtagad ang lalaki bisan og nakamugna na og kaguliyang ang pagpahibalo sa babaye nga nahanaw ang iyang selpon.
Didto na sa maong babaye napunting ang mga mata sa ubang customer. Taud-taud, mitindog ang lalaki nga nagkuha sa selpon. Mitindog usab ang iyang kauban sa atbang nga lamesa.
Kalma kini nga mogawas na unta sa pultahan. Nahukman ni Lando nga babagan ang maong tawo aron dili makagawas. “Ayaw pag-ikyas bai! Under arrest ka, ikaw ang nagkuha sa selpon sa babaye!†giingnan ni Lando ang tawo.
Miduol ang gwardya sa kan-anan. “Dakpa ni siya guard kay anaa kaniya ang selpon sa inyong customer. Siya ang kawatan!†matud ni Lando nga isog na kaayo manulti.
Misuway unta pagsukol ang lalaki apan abtik kini nga gitorse ang iyang bukton ni Lando, kinsa batid sa Aikido kay tinudloan ni Sensei Dhong Reynaldo sa Comjukai.
Dunay polis nga nagpatrolya sa downtown ang misulod ug miposas dayon sa tawo. “Bro, anaa sa wala niya nga bulsa ang selpon sa babaye. Nakakita g’yud ko sa iyang pagkuha,†giingnan ni Lando ang batan-ong polis.
Gidala sa polis ang dinakpan apil si Lando ug ang babaye nga tag-iya sa selpon ngadto sa police station. -- Sumpayan