Gibaylo sa tomboy

Dear Tita Salie,

Hi! Good day. Kanunay gyod ko nga mobasa sa imong column.

Tawga lang ko sa pangalan nga Jerom. Taga Leyte ko pero nia ko sa Lapu-Lapu City tungod kay naa ko diri nagtrabaho.

Nakauyab ko dinhi, Tita Salie, apan sakit kaayo kay wala magdugay ang among relasyon. Iya kong gibulagan kay kuno tungod kay tigulang na ko nga unta 25 years old pa man ko samtang siya 17 years old pa.

Ang nakapait pa gyod niini kay tua siya sa tomboy mahigugma. Iya lang ko nga gibaylo sa usa ka tomboy. Naglisod ko pagsabot, Tita Salie, kun ngano. Busa palihog pasabta ko. Salamat sa imong pagtagad.

* * *

Good day, Jerom,

Dawata na lang ang hukom sa imong hinigugma ug sabta nga bata pa kaayo siya. Ug kay bata pa dili pa gyud kaayo ligdong ang iyang panghunahuna ug dali pa kaayong maapektohan sa estorya sa uban.

Tingali kun dunay nakasulti kaniya nga lain kaayo hunahunaon kay taas og agwat ang inyong pangedaron. O tingali kun ang tomboy lang mismo ang misulti kaniya uban sa paghaylo sa mga butang nga puydeng mahatag sa tomboy kaniya. Ug sa iyang pangedaron dali pa gyud kaayong danihon.

Ayaw usab ikaguol ang iyang gibuhat kanimo kay nagtimaan lamang kini nga dili tinuod ang iyang gugma kay dali ra man kaayong nausab ang iyang hunahuna. Kay kun tinuod pa ang iyang gugma diha kanimo dili niya himuong hinungdan ang imong pangedaron. -- Tita Salie