Wrong number - Gula 4

“Basin gituyo g’yud sa Kahitas-an Nards nga magkaila kita’ng duha karon ug magkasuod kay natukma man g’yud nga ang atong mga kasabot sa pagpanuroy dunay kakulian,” matud ni Nanet nga nabantayan ni Nards nga mitutok pag-ayo kaniya.

“Siguro. Buotan g’yud kining Ginoo kay gihatagan ko niya og amiga nga usa ka maanyag,” matud ni Nards nga mituyo sa pag-ulog-ulog kang Nanet. Mipahiyom ra si Nanet nga nakadungog sa gisulti ni Nards nga pagdayeg kaniya sa iyang kaanyag.

Misulod si Nanet sa usa ka botique nga namaligya og kagamitan sa mga babaye kabahin sa pagpaanyag. “Tabangi ko’g pili Nards kun unsa nga matang sa pahumot ang akong paliton kay maayo ang lalaki nga mopili kun unsay humot para kanila,” matud ni Nanet.

Tuod mitabang si Nards pagpili. “Kini Netz, humot kaayo ni nga perfume,” gitunol ni Nards sa dalaga ang usa ka gamay’ng botelya sa pahumot human niya kini masimhot.

Mipahiyom si Nanet human makasimhot sa perfume, dayong tan-aw sa presyo niini nga gipapilit sa iyang karton. “Humot tinuod no? Apan mahala ‘sab ani Nards uy. Kapin man sa two thousand ang presyo ani,” matud ni Nanet nga mora’g gianugonan.

Nasabot ni Nards nga nagustohan usab kaayo ni Nanet ang kahumot sa mao nga perfume. Giuli ni Nanet ang perfume didto sa dapit nga gikuhaan ni Nards. “Dili nimo paliton Netz? Anugon, humot ra ba g’yud kaayo na,” matud ni Nards.

Wala dayon motubag si Nanet. Padayon kining mitutok sa karton sa perfume. “Wala pa ko’y budget karon Nards. Mahal man gud kaayo kay imported man diay na nga perfume,” matud ni Nanet pagkataud-taud.

Gisakyan dayon ni Nards ang mao nga sitwasyon aron nga masuod pa niya pag-ayo si Nanet. “Wala’y problema. Ako’y bayad ana para nimo Netz,” matud ni Nards nga mikuha pagbalik sa gamay’ng karton nga gisudlan sa perfume.

“Tinuod ka Nards? Kabongga gud nimo,” matud ni Nanet nga nagpahiyom ug klaro kaayo nga wala gayud magtuo nga himuon kini sa bag-o pa niya’ng amigo. Gitawag ni Nards ang promo sa mao nga perfume.

“Dili g’yud ka magmahay ani Ma’am. Humot g’yud na kaayo kusogan g’yud na,” matud sa promo girl. Gibayran ni Nards ang perfume ug nakapasuod kaayo kini ni Nanet ngadto kaniya. – Sumpayan