Hapit kada Sabado’g Domingo, panahon nga way klase, maglalis ang amahan ug anak mahitungod sa relihiyon. Makalugar sila kay mag-abot man sa balay. Ang Papa Dario ni Rudy way trabaho isip kawani sa opisina sa Tasador sa dakbayan. Si Rudy way tungha sa iyang kursong ikatulong tuig sa Accountancy.
Bugtong siya ug ultiawo pa. Nagsugod ni ilang panaglalis sukad nibalhin og laing tinuhoan si Dario. Nibiya sa Katoliko. Nagpabunyag sa Baptist. Usahay singgitan silang Adela, inahan ni Rudy, kapikas ni Dario nga undangon na ilang lalis. Saba kaayo ug way kahumanan. Maayo pa motabang sila’g atiman sa mga customer sa iyang sari-saring tindahan sa ground floor sa ilang dos andanas nga balay sa sityo Dakolat.
Nakaamgo si Rudy nga panatiko sa relihiyon iyang amahan. Sa Katoliko pa iyang amahan, sa gamay pa, pukawon si Rudy og bunal kun di kamata og sayo sa adlaw’ng Domingo. Pugson gyud siya’g pasimba. Karong lain na’g tinuhoan, agnihon gihapon si Rudy sa pagpabunyag ngadto’s iyang bag-ong tinuhoan. Kay ubos ang pagtan-aw sa iyang amahan sa mga tawo nga lahi niya’g tinuhoan. Sagad nga hinungdan sa ilang lalis. Napaling lang dayon iyang pagtuo sa Katoliko dihang duna siya’y nadiskubrehan nga anomaliya sa usa ka pari.
“Wa gyud ko’y problema sa mga tawong lainlain og relihiyon. Kun mutoo la’g Ginoo, God is love man kaha. Busa, dunay common ground ang tanang motuo’g Ginoo bisa’g lainlain og relihiyon. Maghigugmaay lang gihapon. Dili mag-away,†ni Rudy.
“Grabe ka hinawayon iyang amahan mahitungod sa kalihokan sa mga Katoliko.
“Mora ka ma’g wa maggikan sa Katoliko. Pasagdi lang na sila. Respetuhi ang kagawasan ug katungod sa imong isi’g ka tawo sa pagpili og relihiyon o sa panglihok sumala sa ilang tinuhoan,†ni Rudy.
“Ah kanang mag-ampo sa imahe, idolatry man na! Kanang Sinulog, sinunod man sa luog,†ni Papa Dario niya. Wa na lang nitingog si Rudy.
Usa ka buntag, nangompra si Adela kinuyogan ni Rudy. Si Dario lang ang nahibilin sa balay. Dunay nikalit og boto sa tindahan sa silong. Unya nisilaob dayon. Nagdali unta’g panghipos og butang si Dario. Apan dali rang nikuyanap ang kayo. Kun magdugay pa siya sa taas, malumos na siya sa aso. Paghana niya’g kanaug, nagdilaab na ang hagdan. Nagpangapkap siya’g unsay mahimo niyang taming sa kalayo sa iyang pagkanaug. May nahikapan siya ilawom sa lantay ni Rudy. Usa ka marmol nga kinulitan og imahe sa Santo Niño. Salin sa mga imaheng gipamaligya niya sa una sa Katoliko pa siya. Maoy gihimo niyang taming sa iyang nawong pagnaug niya’s hagdan nga nagdilaab na.
Naluwas si Dario. Apan ang balay ug tindahan naugdaw gyud. Pag-abot sa mga bombero, mga silingang balay na lang ang gipasiritan og tubig. Wa niya ikaguol kay insured man ang balay, tindahan ug mga sulod niini. Gitan-aw niya ang imahe ni Santo Niño sa marmol nga mao ray iyang nabitbit. Daw nipahiyom niya.
“Salamat Santo Niño,†tuaw niya sa hilom.
Ug nausab iyang pagtan-aw sa mga deboto sa Balaang Bata. (Katapusan)