Gula 5
Bisan og nasayud na si Daniel nga si Lovely nadala na sa barangay konsehal sa usa ka motel apan wala gayud siya motug-an nga gikan na usab sila didto sa mabugnaw’ng lawak ug ang dalagita.
Taud-taud mibalik na sila si Lovely ug ang duha ka amiga niya nga dalagita nga gikang namalit og makaon. Kini maoy nakapahilom nila ni Daniel, sa chief tanod ug sa konsehal nga nanglibak kang Lovely.
Mideritso si Lovely pagtupad paglingkud ni Daniel. Nakapahiyom ang chief tanod ug ang konsehal sa barangay nga nagkinidhatay tungod kay nakabantay sila nga may relasyon na si Lovely ug Daniel.
“Uy mga ladies, basin gusto mo nga moinum og beer, maayo kay dia pa si konsehal nga andam mobangka,†giingnan sa chief tanod ang tulo ka dalagita. “Sigi, game!†hapit magkadungan ang tulo ka dalagita sa pagtangdo.
Gitunolan dayon sa konsehal og kwarta ang usa sa mga tanod ug giingnan nga papaliton og usa ka case nga beer. “Kamo na la’y inum kay sayo pa ko’ng momata ugma sa buntag,†matud sa konsehal.
Paglakaw sa konsehal, wala na ‘sab magdugay ang chief tanod ug mibiya ‘sab kay miadto kini sa iyang negosyo sa pagpangihaw og kahayopan sa ihawan sa dakbayan.
Mga tanod maoy kauban nila ni Daniel ug sa mga dalagita nga nag-inum sa usa ka case nga beer. Nakabantay si Daniel nga mora’g midatom kang Lovely ang iyang nainum kay nagkayuring na kini sa iyang sinultihan.
Kalit lang mihugyaw ang mga tawo sa palibot. Napawong pagkalit ang suga’ng dagitabnon. Nag-brown out diay ug kalit lang mihakup ang kangiob sa palibot.
Gipahimuslan dayon ni Daniel ang higayon. Gigakus niya si Lovely. Sanglit ngiob kaayo ang palibot, migakus usab si Lovely kang Daniel. Mentras wala pa’y nakadagkut og mga kandela, gipahimudsan g’yud ni Daniel ang kangiob.
Apan kalit lang misiga pagbalik ang suga. Nakit-an g’yud sa mga tawo nga si Daniel naggakus ni Lovely. Naigking si Daniel pagsiga sa suga ug abtik kaayo siya nga nakapalayo sa iyang mga bukton nga migapos sa hawak sa dalagita.
Hasta ang mga tanod nga nakakita ni Daniel sa iyang paggakus ni Lovely napasiga ang mga mata. Gitutokan nila pag-ayo si Lovely ug sa kauwaw sa dalagita milakaw kini ug mibuwag sa grupo.
Gitungab ni Daniel ang usa ka botelya sa beer ug nananghid sa mga tanod nga mobiya na siya. Nakabantay si Daniel nga dunay mga tawo nga mitutok kaniya sa iyang pagbiya.
Sigurado si Daniel nga ang maong mga tawo nakakita nga migakus siya ni Lovely atul sa brownout. - Sumpayan