Gilutos ang gidudahan pagka-ungo

Hapit na mahuman sa iyang pagkaon si Inot dihang nakadungog siya’g tingog nga lanog kaayong nagsinggitsinggit ug sa iyang paminaw mora’g ang iyang pangalan maoy gisigiha’g balikbalik og tawag. Miundang dayon siya sa iyang paniudto ug unya milili sa may binuksan nga bentana ug didto sa may unahan og gamay maoy iyang nakita ang panon sa mga tawo nga sa iyang tan-aw nakaila siya nila. Iya kini silang silingan.

Naa sila si Todik, Enciong, Markus, Kanot, Baloryo, Maning, Kadong, Peryong, Melchor ug uban pang mga silingan nga kuyog nila. Ug didto sa may punoan sa dakong akasya atbang sa ilang balay iyang nakita si Kanot nga nagdala’g talinis nga bagakay ug iya pong nakita tagsatagsa nagdala pud diay’g mga talinis nga mga hinagiban. Matud pang Kanot sa lanog nga tingog.

“Siya ang mangtas nga ungooo! Kana si Kanot ug panahon na nga ato siyang lubaon ug unya kun modagan atong lutasonnn!!! Kay siya ang magsige’g pangabat dinhi sa atong baryooo...daghan na siya’g gipangbugnooo ug unya  may mga binuhi pa natong mga hayop nga gisuyopan sa ilang mga dugooo!”

“Mao naaa...unsa pay atong gipaabottt!!” dihay tingog nga ingon sa miabiba sa singgit ni Kanot. Si Enciong nga tigtaod og tari sa mga hiniktan panahon nga dunay tigbakay dinhi sa ilang baryo.

Tuod misugod dayon sila pagsulong ug ang ilang rumbo mao ang balay ni Inot. Ug kay kusog nga modagan kini si Inot maong kadali ra siyang nakaambak sa ilang balay. Mayao gani kay wala dinhi ang iyang asawa ug anak, tua mibakasyon didto sa isla Tun-og kay taga didto man ang iyang asawa.

Misutoy dayon pagdagan si Inot. Kaniadto sa batabata pa siya nahimo siyang Kampiyon sa “Lumba Dagan” dinhi sa ilang baryo maong natural gyud niya nga kusog siyang modagan ug kadali ra pud siyang nahiabot didto sa may habog nga pangpang nga nag-umbaw sa ubos diin didto pa ang mga silingan nga naglutos niya.

Sa lanog nga tingog siya misinggit, “hoyyyy! mga silingannnn, ayaw tawon mo’g tuo ni Kanottt!! Dili tawon ko ungo uy, butangbutang lang kana niya nakooo!!! Diosnon kaayo ko, mahadlokon ko sa Dios ug dili ko sakop ni Satanas segun sa inyong gituohan. Ang klarong ungo mao si Kanottt ug dili ako, kay kausa ako siyang nakita nga nagtuwad sa may ilawom sa dakong akasya atbang sa among balayyyy! Mao nay tinuodddd, mga silingannnn!!!

“Ikaw man lagi ang ungo, Kanot, ikaw man kuno’y iyang nakita nga nagtuwad ug dili si Inot. Kun mao na ikaw ang among patyonnnn....!” nagkanayon si Enciong nga hait na kaayo’g tinan-awan. “Mga silingan dili man diay si Inot ang ungo kun dili kini man diay si Kanot. Unya unsa may inyong hukom ron, ha, ato ning bitayon si Kanott?”

Ug kay gibati’g kakulba si Kanot mihunat siya’g dagan ug siya na poy gilutos sa mga silingan. Didto sa taas sa pangpang nakita ni Inot ang gibuhat sa iyang mga silingan nga mao ang paglutos kang Kanot. Nagpasalamat siya nga wala madayon ang gilaraw sa mga silingan batok niya. Nagpasalamat gyud siya sa Ginoo.

“Ginoo ko, salamat tawon nga wala ko nimo itugyan sa kadautan, kay ang tinuod nga ungo mao may mipasangil ug nagbutangbutang nga ako mangtas nga ungo...” Ug mipadayugdog siya sa ubos.

Matud pa wala kuno hiapsi si Kanot. Ug matud pang Enciong, nakita pud niya si Kanot nga nagtuwad sa may bagang ling-on sa tubatuba. Ug nianang pagka-hapon, nangayo’g pasaylo ang mga silingan kang Inot sa sayop nilang pagtuo. Unya, pagka-gabii sa dihang matulog na unta si Inot nakadungog siya’g tingog sa wakwak ug matud niini.

“Inot, nia ko aron balbalon ka, animal kang dako, ikaw ang nagpatay sa among iro, busa, magbayad ka, Haaaaa! Wakkkk” ug mikanaas ang bentana ni Inot ug dihang nanaog siya dala ang hait nga pinuti, gidasmagan siya sa wakwak ug nagtuasik ang tigbas ni Inot ug maoy nabati sa mga silingan ang singgit sa pakitabang ni Inot ug silang mga silingan nanagan dayon paingon sa balay ni Inot.

“Haaa, si Kanottt, iya kong gibugnooo, haaa, apan ako siyang natigbasan ug natumba si Inot nga nalukop ang lawas sa kinawrasan. (Kataposan)