Sige na miss! Pasakaha na ang elevator kay nagdali ko. Adto ko sa fifth floor. Tua akong sakyanan naparking didto, hangyo mandar sa lalaking desente og barog. Nagsul-ob og maong nga karsones, sapatos guma nga puti (tataw nga imported) ug T-shirt nga puti nga haom sa iyang lawas nga mora’g body builder.
Abli pa ang pultahan sa elevator. Gipindot ni Norelyn ang pindotonon para “door openâ€. Wa niya buhii. Di pa siya gustong mopalarga sa elevator. Naghulat siya’g naa pay daghang tawong mosakay. Isip elevator girl (wa pay tuig sa trabaho, daga ug way uyab kay galakaw pa sa disinuybe) katungod ni Norelyn nga mohulat og uban pang sumasakay. Apan mas ganahan unta siyang mopasaka dayon sa elevator. Kaso, may gikahadlokan siya.
“Unsa miss? Mahadlok ka’g loguson tika sulod sa elevator, kay kita rang duha?†sa lalaki nga may pagkapikal na ang tunada.
“Dili na maoy hinungdan sir, nga naghulat ko’g laing sumasakay. Sayang ang kuryente kun usa ray pasahero. Pareho god sa dyip depasaheroan o traysikol. Di molarga’g di mapuno. Sayang ang gasolina. Gawas pa, di ka man nawong og rapist†ni Norelyn. Mapahiyumon.
Nilili siya sa gawas sa elevator pagsuta kun may nagpadulong bang mga tawo. Nagpahiyom ang tawo og gamay nga mora sa’g yam-id nga gamay.
Alas otso ron sa gabii. Enero 1, 2011. Nia ang elevator sa Upper Ground sa Bendosti Mall. Karong gabhiona, Upper Ground ra ang kinaubsang kanaog sa elevator. Inig ka alas nuybe, manirado na ang mall.
Nagpuyo si Norelyn sa eskwater erya. Kinamaguwangan siya sa tulo ka anak. Iyang mga ginikanan puro kabus og kagikan. Iyang papa Terio way klarong trabaho. Paekstraekstra og drayeb o pamanday. Tungod sa bisyo sa inom ug sugal nga mas importante pa sa trabaho, wa nay ganahang mopatrabaho niya. Mas permanente ang pamasura. Iyang mama Linda usahay mamasura, usahay manglab-as, usahay manglabada. Pareho man sila’g bisyo’s iyang papa. Nakahuman og hayskul si Norelyn sa pag-working student. Naningkamot siyang makatabang sa iyang mga manghod.
Sa didto pa’s taas ganina ang elevator, may nisakay sa fifth floor nga duha ra ka tawo. Babaye’g lalaki. Nag-abrisiyete. Tataw nga magtiayon. Niingon ang lalaki nga sa Upper Ground sila. Pag-abot sa elevator as fourth floor, may nisulod tulo ka lalaki. Unya kalit nanimaho ang sulod sa elevator. May nangutot. Nagpangusmo ang tulo ka lalaki. Niliraw ang tinan-awan libot sa elevator. Pag-abot sa third floor, nanggawas og dali ang tulo.
“Nangutot ka?†sa babaye ngadto sa lalaki pagsira sa pultahan sa elevator. Hinay iyang tingog. Maguwang lang sa hunghong. Apan nadungog ni Norelyn.
“Didto sa CR ganiha, sa wa pa ta nisakay sa elevator. Nadala diay dinhi ang baho?†sa lalaki.
“Usa gyud diay adtong tulo ang nangutot,†sa babaye.
Nanap-ong sa ilong ug baba si Norelyn. Apan ingnong di siya ang nangutot. Ug konohay gibahoan sab siya. Ana pang sayong gabii nga naglain na iyang tiyan. Tungod tingale sa nakaon niya sa Media Noche. Hapit kada singko minutos makautot siya. Iya lang hinayhinayo’g buhi aron di motingog. Pag-abot sa Upper Ground, nanggawas dayon ang babaye’g lalaki. Nagpislitpislit sa ilang mga ilong.
“Arang arang. May lima ka tawong sumasakay!†tuaw ni Norelyn sa hilom. Nalipay siya nga di na saputon ang lalaking nagdali. Ang tuyo gyud niya nga kun makautot siya’g usab, daghang tawo ang magdudahay kun kinsay nangutot. Bahala’g magpasanginlanay sila’s usa’g usa. Dili gyud siya dayon ang mapasanginlan. Apan kun usa ray kauban niya’s elevator, siya gyud ang seguradong mapasanginlan inig pangutot niya. Siya gyud dayon ang matudlo sa nag-inusarang pasahero. Mao ni ang tinood nga hinungdan nga gusto siya’g sobra sa usa ka tawo ang mosakay sa elevator. Labing daghan labing maayo. Wais sab. (Katapusan)