Ang diary ni Eric

Gamay ra kaayo ang daob nga gihimo ni Eric Cuadro. Ang mga putos ra sa mga pinaskohan nga iyang nadawat. Hinoon, giapil niya sa pagdaob ang iyang diary. Apan ngano?

Nagtutok kang Eric gikan sa jalousy ang iyang sinaligan, si Tasya nga may pangidaron na. Samtang si Eric mag 40 pa sa buwan sa Marso, si Tasya kapin na sa singkwenta ang pangidaron. Kay siya man ang sinaligan ni Eric, nasayod si Tasya sa mga panghitabo. Samtang nagtan-aw si Tasya sa aso sa daob nga nagpaingon sa taas, namalik sa iyang panumduman ang dili  kaayo dugay nga nahitabo.

Maestro si Eric. Usa ka adlaw niana, duna siya’y kuyog. Kauban kono niyang maestro, si Mr. Antonio Maestrado. Gisugo dayon ni Tasya ang katabang nga si Celia, nga areglahon ang kwarto nga bakante, tupad sa kwarto ni Eric. Nagtutok si Antonio kang Celia. Iyang gikidhatan. Pagka gabii na, nanuktok si Antonio sa lawak ni Eric. Pag-abli ni Eric, nakita niya si Antonio nga nag-brief lang. Misulod si Antonio.

Gisirado niya ang kwarto, ug giduol niya si Eric, gikuha ang kamot ni Eric, ug gipasulod kini sa iyang brief. Wa makatingog si Eric. Hinoon, mihigda kini. Busa, nahitabo ang gusto ni Antonio nga maoy mahitabo. Nagtuo si Eric nga siya ra ang gusto ni Antonio. Nasayop siya. Kay sa pagka sunod gabii, si Celia na man ang gisulod ni Antonio. Nagbahad si Antonio. Nga kun badlongon siya sa iyang gibuhat kang Celia, gawas nga dili na kini makatagamtam sa iyang lawas, paka-uwawan pa kono siya sa ilang tunghaan.  Ang nanglabay’ng mga adlaw nahimong semana, ug ang mga semana, nahimong mga buwan, ug naghilak si Celia nga nagpahibawo, nga nagsabak siya. Gihatagan ni Eric si Celia og dakong kantidad, ug gipapauli aron adto sa ila manganak. Sa laing bahin usab, napriso si Antonio. Kay nasakpan nga peke ang iyang mga papeles isip magtutudlo. Dili diay siya tinuod nga graduwado sa kolehiyo.

Ang tanan nahisulat sa diary ni Eric. Nga karon, iyang gisunog. Kay gusto niyang kalimtan ang laing yugto sa iyang kinabuhi. Nakapanghupaw si Tasya. Wa siya masayod unsa na usab ang nagpaabot, sa lain na usab nga yugto sa kinabuhi ni Eric, ug unsa na usab ang mahisulat niya sa iyang sunod nga diary. (Katapusan)