Isla Paraiso - Gula 30

Kaniadto may lig-ong gipasikaran si sister Veronica sa pag-ayad sa gugma ni Rey tungod kay managtrato sila si Jonathan niadtong panahona. Apan karon wala na si Jonathan. Ang iyang pagka madre dili igong katarongan alang kang Rey aron moangka kini sa pagpanimpalad sa iyang kasingkasing.

Kaniadto didto matingob ang pagtagad ni Veronica kang Jonathan. Wala gayod siya matental sa laing lalaki bisan og daghan ang nangulitawo kaniya gumikan sa iyang pagtamod sa gipanumpaan nila ni Jonathan. Apan karon wala na si Jonathan ug dili na gayod kini mobalik kaniya bisan kanus-a nahadlok siya nga tingali’g tuphon ang iyang kasingkasing sa paghigugma pag-usab.

Simbako! Nakatuaw siya sa hilom. Dili kini mahitabo kanako.

Ug misangpit na usab siya pagpangaliya sa Diyos.

Apan si Rey dili mawala sa iyang hunahuna. Bisa’g unsa pay iyang buhaton, bisan unsaon niya paglingaw ang iyang kaugalingon, dili gayod malangkat si Rey sa iyang kaisipan. Ang mga pulong nga gilitok niini sa ilang panagsulti milagingling sa tumang kalanog sa lawak sa iyang hunahuna.

Gugma na ba kini? A, imposible! Gialam-alaman niya ang iyang kaugalingon. Dili mahitabo nga ma-develop ang iyang pagbati ngadto kang Rey sa ingon kadali. Apan nabalaka siya nga sa madugay ug sa madali mobati siya sa ingon kang Rey. Ug dili siya buot nga mahitabo kini. Nabug-os na ang iyang hukom sa pag-alagad sa Diyos sa tibuok niyang kinabuhi. -- Sumpayan pa