Ang abogadong sip-onon

Sukad sa pagkamatngon og buot ni Atty. Owen Entablo sip-onon na siya. Bisa’g karong lima ka tuig na siyang nanglaban, maihap lang ang mga adlaw nga uga iyang ilong. Gani sa ilahang balay, kun way laing tawo, manikma lang siya sa iyang T-shirt. Nagduda lang siya nga duna siya’y sinusitis o kaha sakit sa baga. Apan wa gyud siya nagpadoktor ini. Kay naanad na man siya. Gani, niadtong hayskul pa siya, nagkita iyang Mama Nena ug si Mrs. Silamala, magtutudlo ni Owen sa grade one. “Kumusta na man si Owen? Sip-onon ba gihapon?” mao dayo’y napangutana sa maestra. “Sip-onon gihapon. Apan kamao na manikma” mao say tubag sa iyang mama. Nahimo gyud siyang kataw-anan kay sa gamay pa siya, magsulod guwa ang lalag nga sundalo sa duha ka langub sa iyang ilong.

May kababata ug kaklase si Owen sa elementary ug hayskul. Si Nelly. Brayit kaayo si Nelly. Kada tuig matauran og ribbon.  First Honor o Valedictorian. Apan si Owen, kun makakuha siya’g average nga 78, malipay na siya. Maong kahibulongan nganong naabogado siya. Kay kasagaran gyud sa mga abogado, nakaagi gyud og valedictorian. Ubos ang pagtan-aw ni Nelly ngadtong Owen. Kay gawas nga sip-onon, bogo pa gyud.

Paggradwar ni Owen sa hayskul, nanarbaho na siya. Wa siya pagasto’s ginikanan. Kay daghan silang managsoon. Nahimo siyang mensahero sa bupete ni Atty. Alfred Punto. Didto nakat-on siya’g gamit  og typewriter ug computer. Unya napanid-an sa among abogado nga sharp iyang memory. Maong gidasig siya’s iyang amo mopadayon og abogasya inig human sa kursong Accountancy. Nag-leave lang siya’g duha ka bulan pag-bar niya. Walo ka libro lang iyang gidala. Mga reviewer sa walo ka subject sa bar exams. Wa siya nahimong CPA kay wa man nikuha’g board exams. Bar may iyang giuna. Ug pagpasar, gikapuyan na siyang mag-CPA.

Si Nelly nikuha’g kursong Secretarial. Unya nahimong Stenographer sa MTC sa ilang lungsod. Dako niyang kahingangha nganong naabogado si Owen. Gipalit seguro ang bar exams, niya pa. Apan wa pa gyu’y rumor nga napalit ang bar exams. Tingale ang board exams. Naika’g si Nelly nga mopadayon og abogasya. Labi na nga exposed na siya sa mga legal terms kay nagtrabaho siya sa husgado. Nag-leave siya’g unom ka bulan aron maka-review pagpadayon niyang kuha’g bar exams. Dako kaayo’g gasto iyang mga ginikanan sa iyang review ug bar. Apan way swerte. Hagbong si Nelly. Minghoy siyang nibalik sa husgado isip stenographer. Apan kay gradwado na man siya’g abogasya, na-promote siya sa pagka-clerk of court.

Kun may kaso si Owen sa husgado ni Nelly, maayo na motagad si Nelly niya.  Apan hilom ang dalaga nga may kasuya ug pagdumot sa ulitawo. Dili siya kadawat nga ang bogo ug sip-onon nga bata, nahimong  abogado. Bantayan ni Nelly pirmi ang mga sipyat ni Owen sa pleadings ug sa mga tayada sa husgado.

Mosotsot pa gani siya sa huwes kun angay ba padag-on o pildihon  Owen.