Mananaygon

Gula 5

Dali ra kaayo nga nakapangompra og lainlaing kagamitan sa panimalay sila si Robert ug Marilyn. Ang ilang panag-uban maoy nakapasuod kaayo kanila. Diha’y higayon nga wala pa’y alas singko sa hapon mipauli si Robert gikan sa iyang trabahoan nga luya kaayo ang panglihok-lihok. Gisugat siya’g pangatahuran ni Nang Felomina.

“Mora ko’g gihilantan, luya kaayo ang akong lawas,” giingnan niya ang tiguwang. Mora’g mibathay sa panagway ni Nang Felomina ang kalooy ngadto ni Robert.

“Ako ka’ng pamasahean ni Marilyn sir kay maantigo man kana siya nga momasahe. Siya ang tigmasahe nako kun hilantan ko,” matud ni Nang Felomina nga mitapion sa iyang kamot sa liog ni Robert. “Gihilantan ka g’yud tuod.”

Gibiyaan ni Robert si Nang Felomina ug mideritso siya pagsulod sa iyang kwarto. Wala gani hukasa ni Robert ang iyang T-shirt ug karsones ug mideritso na siya’g higda tungod sa kakapoy.

Gibuy-od ni Robert ang iyang lawas sa kotson niya nga higdaanan ug gipiyong ang iyang mga mata. Kapoy g’yud kaayo sa iyang pamati. Taud-taud, may nanuktok sa pultahan.

“Kinsa na?” hinay ang tingog ni Robert. Anam-anam nga mibukas ang pultahan sa kwarto ni Robert ug nakita niya nga adunay mili-li. “Bert, gihilantan ka man kuno ingon si Lola. Pamasahean ka kuno nako,” ni Marilyn nga misulod sa kwarto.

“Kamao ka ba diay momasahe Lyn? Basin og kapoyon ka unya,” matud ni Robert. Wala motingog si Marilyn. Iyang gitapin-an ang liog ni Robert ug nabatyag niya nga init ang iyang amigo.

“May panghaplas ka ba Bert?” gisukna niya si Robert. Gitudlo dayon ni Robert ang panghaplas nga gitungtong niya ibabaw sa tukador. “Hukason nato ang imong T-shirt Bert ug apilon na lang nato ang imong pantalon para dili ko maglisud pagmasahe nimo,” matud ni Marilyn.

“Mauwaw ko nimo Lyn,” ni Robert pa. Nakasabut si Marilyn nga mauwaw si Robert nga maghukas. “Ayaw lang paghuna-huna og malisya gud kay para matarung nato og masahe ug mabalikan ka sa kabaskog,” pasabot ni Marilyn.

Nanglimbasog si Robert sa pagtindog ug gihukas ang iyang gisul-ob. Mibalik siya’g higda sa kotson ug nag-ubo. Gisugdan dayon ni Marilyn ang pagmasahe ni Robert sa iyang buko-buko.

Miagulo si Robert dihang gisugdan na’g hapyod ni Marilyn ang iyang buko-buko. Paminaw ni Robert mora’g dunay mga lisay-lisay nga nangapigsat didto sa ilawom.

“Daghan ka man diay kaayo og mga pamaol Bert,” giingnan ni Marilyn ang iyang amigo nga tag-iya sa panimalay nga ilang gipuy-an. Diha pa masayri ni Robert nga maayo diay kaayo si Marilyn nga momasahe.

Dihang gitukoran ni Marilyn ang sampot ni Robert pinaagi sa iyang duha ka palad, nabatyag ni Robert ang kalalim sa iyang pamati. - Sumpayan