Isla Paraiso

Gula 21

“Tinuod kana,” ni sister Veronica pa. “Wa gyud ko mag-expect nga moanhi ka karon, Rey. Mao bitaw nga sa dihang gipahibalo ako sa among madre superyor nga may bisita ako, naglibog ko kun kinsa ang maong tawo kay wala man ako’y gipaabot nga bisita karon.”

“Wa ba ko makasamok nimo?” ni Rey.

“Okey lang,” ni sister Veronica. “Nakahuman na man ko sa akong evening devotion.”

Kahilom.

“Unsa man diay’ng hangina ang nakapadpad kanimo paingon dinhi?”

Gigamit sa madre ang labing komon nga ipangutana sa usa ka dumoduong.

“Dili puwersa sa hangin ang nagdala kanako dinhi, sister Veronica,” ni Rey pa, “kun dili ang puwersa sa akong pagbati.”

Mihabol kanilang duha ang bagtok nga kahilom. Si sister Veronica ingon sa nasud-ipan sa iyang nadungog gikan kang Rey. Daw wala magdahom ang maanyag nga madre nga mao kadto’y ikasulti ni Rey sa iyang atubangan.

Miigham si Rey pagkilab sa pipila ka daklit aron paggisi sa kahilom nga mibukot kanila.

Ang diha karon sa hunahuna ni Rey mao ang pagpadayon sa iya nang nasugdan ug iya nang gihimo kaniadto -- ang pagpangulitawo kang Veronica kon sister Veronica. Gihatagan na niya kini’g kagawasan kaniadto pinaagi sa pagbutyag sa maong pagbati ngadto sa dalaga apan tinakpan ang pultahan sa kasingkasing sa babaye alang sa iyang gugma. -- Sumpayan pa