Mitugpa ang super typhoon Yolanda sa Tacloban City. Tanang bentana, entrance ug exit door sa matahom, lig-ong dos andanas nga balay ni Yeno gisirad-an. Apan nahibulong siya nganong ilang iro gikan sa underground, wala na mobalik sa ubos. Igo lang kining mipatong sa lamesa ug nagsige’g paghot.
Gibugaw ni Yeno ang iro. Apan wala gyod mopahawa. Hinuon, misamot kakusog ang pagpunay’g paghot. Ingon sa adunay importanteng mensahe nga ipasabot. Duolon unta ni Yeno ang iro aron papahawaon sa talad nga gitungtongan. Apan kusog hinuon kaayo kining milayat tumong sa nahimutangan ni Yeno. Maayo gani kay nakalikay siya ug didto mitugpa-hagba ang iro sa tinakpan nilang bentanang jalousies.
Miliki ang bildong jalousies. Unya, inanay’ng nabuak ug may bul-og sa tubig nga misulod. Sa sinugdan, mora’g gripo nga nangihi. Apan paglabay sa pipila lang ka segundos, nabungkag ang bentana nga gidasmagan sa kusog hangin ug daw baha nga naglumba pagsulod ang nagdagang tubig.
Didto pa masayod si Yeno nga gisugdan na diay’g sanap ang dos andanas nilang balay. “Saka sa taas! Daliiii!†Mandar niya sa tibuok niyang pamilya. Ug naglumba sila’g panagan padulong sa 2nd floor.
Kusog mitubo ang gitas-on sa tubig. Miabot na kini sa ilang nahimutangan. Busa, mikatkat pa gyod sila sa pangki hangtod ngadto sa kinatas-ang bahin sa ilang pinuy-anan. Apan mangtas si Yolanda. Gilupad ang ilang atop human huypa sa dili mabangbang nga hangin. “Gunit mo pag-ayo sa strasis! Ayaw pamuhi, bahala na’g unsay mahitabo!†Siyaok sa nagkurog ni Yeno nga misangpit-order sa iyang mga minahal sa kinabuhi. Uban kaniya sa paggakos sa puthaw’ng strasis, ang kinamanghoran nilang anak, samtang sa pikas, kauban ang ilang kinamagulangang liwat sa iyang asawa nga puwerte pong nakahawid sa puthaw’ng butang nga mao na lamay kataposan nilang taming batok ning makahahadkok nga katalagman.
“Lord, luwasa tawon kami!†Siyagit sa tibuok pamilya. Naghagiyos-nanaghoy’ng hangin ug ulan nga daw nagdala’g mga hait nga bas mipadayon sa pagkastigo kanila. Ang kasakit, ang katugnaw ug ang kahadlok wala’y hunong nga milatos sa ilang balatian. Hangtod nga mitubo pa gyod ang gitas-on sa tubig, nahimong bungtod ang mga balod nga mihasmag kanila. Ang trasis nga ilang gigakos nahisama sa gibuak nga kawayan, maayong pagkatunga. Ug gianod sila sa sulog nga nagkatibulaag sa nagkalainlaing direksyon.
Paghubas sa tubig, nagkakitaay ang pamilya ni Yeno. Pulos sila nakaabay’g bani sa saging busa naluwas. Apan naguol gihapon sila. Kay ang kinamagulangan nilang anak, kinsa bag-o lang migraduwar sa kolehiyo, wala nila mapalgi. Hasta ilang iro, kinsa ilang giisip nga maoy naka-anghel kanila tungod sa paghasmag niini sa ilang jalousie, wala sab nila makit-i. Hain na man diay sila?
Mitibi si Yeno dihang ilang nalabyan sa dalan ang daghang nagpasad nga mga patay’ng lawas sa tawo ug mananap. Gitagsatagsa nila paglili ang mga nawong niini. Apan wa ... wala diha ang ilang gipangita. (Kataposan)