Karon pa lang, nasayod nang daan si Rey nga dili kining higayona ang kataposan sa iyang pagpakigkita kang sister Veronica sa kombento. Mao hinuon kini ang sinugdanan sa masubsob unya niyang pagbisita sa madre.
Samtang nagpalandong niini, si Rey nakasukot sa iyang kaugalingon kun dili ba kaha pul-an si sister Veronica sa pagpakig-atubang kaniya kun kanunay na lang siyang magsamok niini? Tingali’g sa kadugayan dili na makigsulti ang madre kaniya kun magpunay siya’g pamisita sa kombento. Nasayod siya nga sa kahimtang karon ni sister Veronica, usa ka dakong pagsamoksamok sa kinabuhi niini ang iyang pagahimuon.
Nabatyagan ni Rey karon nga dihay tipik sa iyang kagahapon nga nabanhaw. Ang nanglabay nga angay nang ilubong sa kalimot buot niyang sumpayan niining panagkita pag-usab nila ni sister Veronica. Nasayod siya nga tungason kaayo ang dalan sa pagsulay nga iyang pagasubayon sa iyang buhaton. Apan dili niya igsapayan ang tanan mahatagan lang og katumanan ang sugo sa iyang pagbati.
Naputol ang pagtidlom sa iyang hunahuna sa halawom nga pagpamalandong sa dihang nakadungog siya’g tinagaktak sa mga tiil nga nagpaingon sa iyang nahimutangan. Miyanghag siya. Dihadiha maoy misugat sa iyang mga mata ang maanyag nga bayhon ni sister Veronica nga nagsul-ob gihapon sa sinina sa usa ka madre. Angayan kini sa gisul-ob nga sapot.
“Rey...!†sa madre nga miduol kaniya.
“Nasayod ko nga makalitan ka gayod niining akong pag-anhi,†matud ni Rey. -- Sumpayan pa