Gustong kuhaon

Dear Tita Salie,

Maayong adlaw. Mga panghinaot nga malipayon ka unta karon sa imong kinabuhi. Happy Valentine’s diay, Tita, kay Feb. 14, man nako ni gipadala ang akong suliran.

Nindot kaayo ka mohatag sa imong advice, Tita, ganahan kaayo ko tungod kay duna man ko’y makat-unan nga mga pagtulon-an.

Tagoa lang ko sa ngalan nga Risa, usa ka inahan apan dili pa asawa. Ang akong problema kabahin kini sa among sitwasyon, sa amahan sa akong anak. Duha ka tuig mi nga nagtipon sa amahan sa akong anak. Duna mi anak nga 1 ka buok ug ania kanako karon. Tungod lagi kay managlahi man ang among gusto wala gyod magdugay ang among relasyon ug nagkabulag mi.

Ania kanako ang among anak ug karon gusto kining kuhaon sa iyang amahan. Dili ko mosugot nga iyang kuhaon, Tita, kay kaya man nako kining buhion. Unya mamugos gyod siya  ug matud niya nga iya kuno kong ikiha kondili gyod nako ihatag ang bata.

Makuha ba gyod niya ang akong  anak, Tita, kun iya kong ikiha? Palihog pasabta ko ug tabangi ko sa angay nakong buhaton. Thank you very much and more power.

* * *

Maayong adlaw. Ayaw kabalaka ug labaw nang ayaw kahadlok sa gisulti sa amahan sa imong anak. Tungod kay dili gyod mahitabo nga makuha niya ang bata gikan  kanimo. Wala seguro siya masayod sa atong balaod mahitungod niini. Linawa ang imong panghunahuna ug padayon sa imong paningkamot alang kaninyong duha sa imong anak. Tinuod nga lisod kaayo ang pagpadako og anak apan nasayod ko nga kaya nimo kining buhaton. Ang imong mga paningkamot ubani kini kanunay og mga pag-ampo tungod kay aduna kita’y Diyos nga andam kanunay motabang sa tanan nga nagkinahanglan.

Dapat masayran sa amahan sa imong anak nga wala siya’y mahimo sa pagkuha niya sa bata. Tungod kay ang bata nga anak sa wala makasal ug puyopuyo lang ang inahan ang mas dunay katungod niini.

Bisan unsaon sa amahan wala gyod siya’y mahimo pagkuha kay mao kini ang gimbut-an sa atong balaod. Ayaw kahadlok kay wala siya’y kaso nga puydeng ipasaka kanimo. Hinuon, puyde pa nimo siyang mapugos pagpangayo og suporta sa bata kay duna siya’y obligasyon isip amahan. -- Tita Salie