Timplada

Mag-hike si Zoilo kada sayong buntag. Sa di pa siya moatiman sa iyang karenderya. Unya di malikayan niya nga sakitan nga magtan-aw sa karenderya sa iyang mama daplin sa karsada. Mingaw na kaayo. Wa nay mga truck nga mamarking. Kaniadto sa wa pa sila magbuwag og negosyo, kusog kaayo ang maong karenderya. Napugos siya pagbiya ug pagtukod og laing karenderya tungod sa di makatarunganon nga kinaiya sa iyang mama.

Iyang mama maayo mangluto. Apan nalupigan niya. Kay si Zoilo nakatrabaho og five star hotel bali’g lima ka tuig. Assistant cook siya. Ug sa pagsira sa hotel tungod sa labor case, wa na nanarbaho si Zoilo. Nagsabot silang magsosyo sa iyang  Mama Concha nga dugay nang biyuda. Duha ra silang magsuon. Si Zoilo ang ikaduhang anak. Ang iyang maguwang nga si Zoren, bisyoso nga pagkatawo. Dagha’g anak nga puro lang kinamaguwangan. Way gipakaslan. Kaguwapo lang ang puhonan. Apan way sulod ang utok. Tulo ka kurso gieskuylahan. Apan puro lang sugod. Way gihuman. Sa ilang sosyo sa iyang mama, magbahin sila matag tuig sa ilang ganansiya. Tunga. Unya si Zoilo suweldohan binulan isip chef. Mao sab iyang Mama Concha, sweldohan isip manedyer. Apan mas dako ug way subay ang kuwarta makuha ni Zoren. Kada adlaw mangayo og kuwarta si Zoren para mintin sa iyang bisyo sa pamabaye, inom, drugas ug sugal. Wa siya’y lihok natabang sa negosyo. Puwerteng tapulana.

Gibadlong ni Zoilo iyang mama. Apan siya pa hinuoy kasab-an. Ang paboritong anak mao man gyu’y gitawag nga black sheep o spoiled. Bisa’g asa gyung pamilyaha, ang pinangga, mao gyu’y maldito, bagsik ug pinatuyangan sa gusto. Sakitan si Zoilo maghunahuna nga siya dako’g kahago sa ilang negosyo. Unya iwaldas lang ang abot sa tawong wala’y bisan diyutay’ng singot napatulo.

Tungod kay magpangita ang mga customer sa timplada sa pagkaon ilang nauyonan, nagkawala ang mga customer sa iyang mama. Unya namalhin sa karenderya ni Zoilo, nga may gilay-ong duha ka kilometro gikan sa unang karenderya.

“Kay pareha’g timplada inyong mga utok, kamoy pag-uban. Ako maglain ko,” mao ni ang katapusang pulong gibuhian ni Zoilo ngadto sa iyang mama. Sakitan unta siya. Apan duna gyu’y angay tudloan og leksiyon. Manglugmaw iyang luha nga magpanglingo sa kada agi niya duol sa tindahan sa iyang mama. (Katapusan)