Dear Tita Salie,
Hello! Kanunay gyod ko nga mobasa sa imong lindog ang pasabta. Ganahan ko mobasa niini tungod kay punto kaayo ka motambag ug dali ra kaayong masabtan.
Tagoa lang ko sa pangalan nga Melba, usa ka inahan apan dili asawa, single mom. Ang akong problema mahitungod sa akong anak.
Dili gyod lalim ang mag-inusara nga magpadako sa bata, Tita, busa midangop gyod ko nimo kay mangayo ko nimo og tambag kun unsay maayong buhaton.
Sukad sa akong pagpanganak, Tita, hangtod karon nga 5 na ang pangedaron sa bata ako ra gyod ang tanan nga diskarte tungod kay wala na man ko’y balita bahin sa amahan sa akong anak. Wala say nakasulti kanako kun hain kini magpuyo karon.
Gusto unta ko magpatabang sa amahan sa akong anak, Tita, sa mga gastohan sa bata. Bisan kun gamay lang nga suporta malipay na seguro ko kay at least dili na kaayo ko maglisod.
Mapugos ba nako ang amahan sa akong anak sa pagpasuporta sa bata, Tita? Asa man ko moduol niini aron mapugos gyod siya? Palihog pasabta ko sa angay nakong buhaton? Daghang salamat sa imong pagtagad. God bless.
* * *
Hello, Melba.
Tinuod nga dili gyod lalim ang pagbuhi og anak. Tungod kay daghan kaayo ang gastohan. Maglisod man gani ang pagbuhi og anak nga nagtinabangay pa ang amahan ug inahan sa pagpangita og kwarta, unsa pa kaha kun ikaw rang usa.
Dili malisod ang pagpangayo og suporta sa bata. Mapugos gyod ang amahan nga suportahan ang iyang anak bisan kun siya minyo pa sa laing babaye. Tungod kay iya gyod kining responsibilidad ang suportahan ang iyang anak.
Apan dinhi sa imong sitwasyon lisod nato kining buhaton kay kinsa man ang atong pugson kun wala ta masayod kun hain na kining tawhana. Asa man nato siya pangitaa? Asang kompanyaha nato siya isumbong nga wala man kita’y idea kun hain siya magtrabaho karon. Kinsa usa’y nasayod tingali kun dugay na siyang mipanaw ngadto sa laing kalibotan tungod kay wala na may balita mahitungod kanila.
So, wala gyod tay pugson kay wala na man tay idea kun hain siya. Ang una nimong buhaton mao nga imo una siyang pangitaon kun hain siya. Puyde nimo siyang i-search sa Facebook kay tingali kun imong matsambahan ug imong makit-an ang iyang account. Pangita og kaila nga kamao mangita o mobuhat niini. Kun imo na siyang makit-an usa pa nimo siya puyde nga mahangyo ug mangayo ka og suporta alang sa inyong anak. -- Tita Salie