Uhaw sa pagmahal

Gula 2

Gisakyan dayon ni Rudy ang higayon dihang giingnan siya ni Elma nga mobalik kini sa doktor nianang buntaga. Mikuot dayon si Rudy sa iyang pitaka ug gitunolan na usab si Elma og P2,500.

“Husto na ba kini nga magamit nimo Elm?” matud ni Rudy nga klaro kaayo nga andam nga modugang ug nagpaabot lang kun si Elma moingon nga kuwang ra ang iyang gihatag.

“Subra na tingali kini Rud uy kay P250 ra man ang follow-up check-up gawas lang kun mo-require ang doktor og laboratory examinations,” ni Elma pa. “Aw, ayaw kabalaka niana, dia ko nga andam motabang kanimo kanunay,” matud ni Rudy.

Human dawata ni Elma ang kwarta, iyang gitutokan si Rudy. “Unsaon kaha nako sa pagbawos kanimo Rud, wala na may trabaho ang akong bana ug wala ‘say ganansya ang among tindahan.”

Nagpahiyom si Rudy. “Ayaw na kana paghuna-hunaa Elm, kun makahigayon ka unyang gabii, adtoa lang ko sa balay kun makalugar ka, ako ra man usa karon kay milarga sila si Mama sa Bohol.”

Ingon sa nakalitan si Elma sa pagkadungog sa gisulti ni Rudy nga paadtoon siya sa iyang balay inigka-gabii. “Kun makalugar ka lang Elm, kun wala kay lugar, ayaw lang pugsa,” dugang ni Rudy, dayon nagbuwag sila pagpanglakaw.

Nasayud si Rudy nga nakasabut si Elma sa iyang tumong nga paadtoon kini sa iyang balay inigkagabii. Ang tinuod, dili makatoo si Rudy nga buhaton kini ni Elma kay nasayud siya nga buotan kini nga pagka-asawa.   

Gabii na nga nakapauli si Rudy gikan sa iyang trabaho kay mihapit usa siya sa department store. Diha pa siya nahinumdom nga gikomedyahan man diay niya si Elma nga paadtoon sa iyang balay.

Alas dies na sa gabii, nagkalingaw gihapon si Rudy og pindot-pindot sa iyang touch-screen nga cellphone. Mao kini ang sagad buhaton ni Rudy matag gabii aron dali ra siya nga dukaon.

Tuod, giduka na g’yud pag-ayo si Rudy. Gibutang na niya ang selpon sa gamay niya nga lamesa kilid sa iyang higdaanan. Dali ra kaayo nga giganoy sa katulogon si Rudy.

Sanglit dili kaayo dikit ang kabalayan nga gipuy-an ni Rudy sa Barangay Kinasang-an, mingaw na kaayo ang maong dapit. Nahigmata si Rudy kay adunay nanuktok sa pultahan sa iyang balay.

Gilili ni Rudy ang pultahan aron makita kun kinsa ang nanuktok sa ingon na niini ang takna sa kagabhion. Gikulbaan siya kay pag-agi niya kaganina may namatay ra ba sa ilang silingan sa unahan.

Bayhon sa babaye ang nakita ni Rudy nga nagbarog sa pultahan. Wala g’yud masayop si Rudy, si Elma ang babaye nga iyang nakita. - Sumpayan