Wala kapugngi

Dear Tita Salie,

Have a wonderful day and I hope that you are always in good health. I really appreciate your ability nga motambag, Tita, tungod kay makuha gyod nimo ang mga problema nga among gipadala. Imo gyod kining mahatagan sa hustong kasulbaran.

Just call me Ms. Capricorn, 20 years of age, dili pa ko minyo apan duna ko’y live-in partner karon. Duna ko’y trabaho sa usa ka kompanya. Medyo gamay lang ang sweldo apan maayo na lang nga duna ko’y income matag bulan.

My problem is about my lovelife. Diri man gud sa company nga akong gitrabahoan duna ko’y katrabaho nga nasuod. Siya gyod ang akong naamigo sukad pa sa sinugdan nga nasulod ko sa maong kompanya. Kami kanunay magkuyog og pangaon during lunch break. Hangtod wala kapugngi nanguyab siya nako.

Tungod kay na-develop pud ko pag-ayo kaniya tungod sa maayong batasan nga iyang gipakita kanako ako siyang gisugot ug hangtud nga duna gyo’y nahitabo tali kanamong duha.

Nahigugma na gyod ko pag-ayo kaniya, Tita, apan duna ko’y live-in partner. Pero dili pa man mi kasado. So, puyde pa ko mogawas niini. Tinuoray kaha kining sa akong bag-ong uyab ngari kanako, Tita? Naglibog na ko unsay akong buhaton? Palihog pasabta ko. Thank you and God bless.

* * *

Hello!

Mao gyod kini ang nature sa tawo, nga ganahan siya o maoy iyang gusto nga dunay challenge ang kinabuhi. Kay alang sa tawo boring ang life kun wala’y hagit nga atubangon.

Normal ug wala’y hasol ang imong kinabuhi dihang wala ka pa makigrelasyon nianang kauban nimo sa trabaho. Kanunay kang dunay peace of mind ug wala gyo’y gubot ang ulo. Pero dihang imong gisudlan ang maong relasyon, nahimong komplikado ang tanan tungod kay nana man kay daan nga kabilinggan.

Yes, tinuod nga duna ka pay kagawasan nga mopili og lain ug ilisan ang imong daan tungod lagi kay dili pa mo kasal. Apan ang pangutana kun dali ra ba usab ang pag-ilis sa nahiuna.

Niining imong sitwasyon kinahanglan gyod nimong timbang-timbangon. Aron wala’y pagmahay kinahanglan imong masabtan ug mailhan ang tanan. Busa mas maayo gyud nga imong hunahunaon sa makadaghan.

Nganong imo mang giilisan ang nahiuna, gipul-an ka na ba niya? Tingali baya kun pul-an kana usab niining ikaduha ug lain na sab unyang problema. So please make-up your mind. You need to choose nilang duha. Kun kinsay mas bug-at nimo maoy pilia. Apan pahibaw-a gyud ang pinilian aron dili siya maglagot kay kalit lang nimong gitalikdan. -- Tita Salie