Isla Paraiso - Gula 10

“Wala ka ba maunsa, Miss?” gisukot sa lalaki si sister Veronica.

Miliso si sister Veronica ug miatubang sa lalaki. Apan sa kalit lang managsamang nanagko ang ilang mga mata. Ingon sa ang usa’g-usa kanila dili makatuo nga magkita sila niining higayona.

“R-Rey?” Gitutokan pag-ayo ni sister Veronica ang lalaki. “I-ikaw ba kini?”

“V-Veronica?” Mibalos pagsukot ang lalaki nga wala usab mamilok nga misuhid sa tibuok bayhon sa madre. “I-ikaw ba usab kini?”

“Oo,” ni sister Veronica. Usa na ako ka madre.”

Ang mga pasahero igo lang nagkatinan-away. Dihadiha ilang nasabtan nga daan nang managkaila ang duha ug sa ilang pangagpas dugay nang wala magkita silang duha.

“Ikaw,” ni sister Veronica na usab. “Kumosta ka man?”

“Nia,” ni Rey pa. “Usa na ako ka polis karon.”

“Unsa?”

“Kaganina sa pag-atake sa mga hold-aper,” ni Rey pa, “naglisod ako sa paglihok tungod kay nabalaka ko nga tingali’g may mapagan nga mga pasahero. Apan sa dihang buot ikaw lugoson niadtong usa ka hold-aper, namahala na lang ko.”

Naputol ang panagsulti sa duha sa dihang ilang nadungog ang siren sa sakyanan sa kapolisan nga nagsingabot. Mihunong kini diha sa tungod sa nag-urong nga bus nga gisakyan sa mga pasahero nga gitulis sa mga hold-aper nga napatay ni Rey.

Nakuha pagbalik sa mga pasahero ang ilang mga salapi ug alahas nga gisulod sa mga hold-aper sa dakong bag. -- Sumpayan pa