Gula 238
Gusto unta nakong tamparason si Neggar tungod sa akong kalagot, apan wala ko na kini buhata. Kay sa sinugdan pa nadawat na nako nga ingon gyud niini ang kinabuhi. Nabuhat usab nako ang nabuhat ni Neggar.
Mibiya ko sa balay ni Neggar dala ang dakong kaguol ug pagmahay. Kun ako pa lang untang giseryoso ang akong pagbag-o nga gihimo kaniadto, kun ako pang gipadayon ang pagsige’g kuyog sa simbahan matag buntag hayan dili na nako nahiagoman kining laing kagul-anan.
Wala destinasyon ang akong lakaw. Wala ko masayod kun asa ko paingon. Naglakaw ako subay sa kalsada bitbit ang usa ka bag nga maoy gisudlan sa akong mga sinena.
Miabot ang kakapoy sa akong mga tiil, busa mihunong ko sa usa ka waitingshed ug milingkod. Samtang naglingkod ko sa waitingshed nagsige gihapon og pangambak ang akong mga luha sa akong mga mata.
Gusto unta nakong tawagon si Mama aron sultihan siya sa akong nahiagoman, apan gidaog ko sa akong garbo. Dili ko gusto nga yawyawan na usab ako sa akong mga ginikanan. Busa akong gidawat ang nahiagoman sa akong kinabuhi. Paglabay sa pipila ka minuto, milabay ang usa ka pasaherong multicab nga paingon sa highway Mandaue ang rota. Misakay ko.
Gitrapohan nako ang akong mga mata aron dili matingala ang mga pasahero didto sulod sa multicab. Pag-abot nako sa highway Mandaue City, mikanaog ko sa multicab nga akong gisakyan. Igo gyud sa akong pagkanaog dunay mihunong nga 21A nga jeep nga mobiyahe paingon sa Cebu City. Midali ko pagsakay. -- Sumpayan pa