Midangop ang asawa ni Neggar sa korte aron pagpangayo’g suportang pinansiyal gikan kaniya. Nagpakita si Neggar kanako kuyog ang iyang asawa. Ang korte mimando kang Neggar paghatag og financial support ngadto sa iyang asawa ug anak. Mao kini hinungdan nga wala mokontak si Neggar kanako. Kay nahadlok usab siya nga tingali og pasakaan siya’g kaso sa iyang asawa.
Kasado si Neggar sa iyang asawa. Kun mokiha ang iyang asawa, dako’g posibilidad nga mabilanggo ming duha si Neggar.
Niini, mibati ko’g dakong disappointment. Wala ko magdahom nga may kabilinggan na diay sa kinabuhi si Neggar kay mihagad pa man gani siya sa pagpakasal namo. Apan diay...! Sus, maayo ra gyud nga wala ko magpakasal niya. Mosamot unta’g kadako ang akong problema.
Ug dili pa gyud lisod sa iyang asawa ang pagpasaka og kaso kanamong duha ni Neggar tungod kay banggiitang abogado ang amahan niini. Maayo na lang kay bisan sa gibuhat ni Neggar nga pagluib, kalmado lang gihapon ang iyang asawa.
Hinuon, wala pugsa si Neggar nga mobalik siya sa iyang asawa. Maoy gusto sa iyang asawa nga kun dili na si Neggar mobalik kaniya hatagan siya ug ang ilang anak sa hustong suporta.
Apan mihukom si Neggar nga mobalik sa iyang pamilya kay naluoy siya sa ilang anak. Nangayo og pasaylo kanako si Neggar. -- Sumpayan pa