Kay way nagmahal, magpakamatay na lang...

Grande ang ilang kasal niadtong hapona ug misibat dayon si Paolo ug Lydia sakay sa kotse padulong sa giabangan nga apartment. Mora’g salampati ang duha nga nagtupad sa sakyanan ubos sa nag-alintabo nga pagbati. Ug wa lang palandonga, medyo nagsakit ang tiyan ni Lydia ug paghinol pa sa iyang bilahan namatikdan nga basa ang iyang tapulado. Pula ang kolor ug giabtan sa binuwan nga balatian sa babaye. Gidugo diay si Lydia....!

“Honey, di puwede karon..., the ground is very wet!” Ug misandig sa dughan ni Paolo si Lydia. Nakalitan si Paolo sa gisulti ni Lydia ug way tingogtingog nga gihagkan ang bag-o niyang asawa. Pag-abot sa apartment, dali silang nanaug sa sakyanan. Naghinamhinam si Paolo sa kahidlaw.

“Please Honey, di lagi mahimo karon. The ground is very, very wet...!” Nabati ni Paolo ang parayegong sulti ni Lydia nga wa lang sab mamugos.

Apan nianang pagkagabii, mihangyo na sab si Paolo. Mao lang gihapon ang tubag ni Lydia nga di mahimo kay “the ground is very wet....!”

Sa ikaduha nga gabii, gikarinyo ni Paolo ang iyang asawa. Giukoban ang ngabil ni Lydia ug giwalis ang nipis nga sinina. Mibalibad ang asawa sa mao gihapong katarungan. Nangatulog na lang ang duha nga way nahitabo sama sa unang gabii.

Ikatulo nga gabii, wa na kaantus sa kahidlaw si Paolo. Giayo niya pagromansa ang asawa nga mibaod kaniya sa pag-ingon: “Kun di ka patuo, mobalhin ako’g higda...!” Naglain ang buot ni Paolo ug nangatulog sila nga nagtalikdanay.

Sayo sa buntag, milahoy paglakaw paingon sa trabaho si Paolo nga wa manamilit ni Lydia. Pagpauli niya nianang pagkahapon, wa molahus sa apartment si Paolo. Ug gumikan sa kahiubos ni Paolo sa bag-o niyang asawa, mikatkat hinoon sa nakitang lubi ug pag-abot sa tungatunga, misinggit si Paolo:

“Puslan man nga way nagmahal..., maayo pang maghikog!” Lanog ang singgit ni Paolo nga nakapakurat sa iyang mga silingan. Bag-ong minyo magpakamatay.....?

Gitawag sa mga silingan ang mayor sa lungsod uban ang huwes lakip nang si Kapitan JunCab sa balangay.

“Kanaug diha kay atong sulbaron kanang imong problema....!” Matud pa sa mayor.

“Di ka makasulbad sa akong problema. Maayo pang magpakamatay....!” Tubag ni Paolo ngadto sa mayor.

Si Lydia nga nahiabot gikan sab sa trabaho, nahibulong kaayo sa mga tawong nagpunsisok sa punoan sa lubi uban ang mayor ug huwes lakip na kang kapitan Juncab. Nakita niya sa tungatunga sa lubi si Paolo ug mihilak si Lydia nga nagpakilooy. Wa manumbaling si Paolo sa pakilooy ni Lydia nga midali pagkuha sa pari nga nagkasal nila.

“Honey please, hear, me. I love you so much....!” Pakilooy ni Lydia kuyog sa gikuha nga pari pagtukma niya sa punoan sa lubi nga gisak-an ni Paolo. Nabati niya ang pulong sa iyang asawa ug napoypoy si Paolo. Midailos siya sa ubos ug pagtangka sa yuta miluhod si Paolo sa pari.

“Pasayloa ako padre sa akong kasal-anan...!” Nagkanayon si Paolo ngadto sa pari ug gipanalanginan siya. Gihakop dayon ni Lydia si Paolo ug gihapuhap ang gisingot niyang nawong. Gihagkan sa dakong kalumo ug pagmahal si Paolo ug mihunghong:

“Your wish is granted and everything is clear now. We will enjoy tonight!”

Mibarug ang nagluhod nga Paolo nga giagak ni Lydia paingon sa ilang apartment ug ang mga silingan nga nakasaksi sa hitabo nakasabot na sa hinungdan. (Kataposan)