Ang kliyente sa gawas sa husgado

Alas otso i medya sa buntag. Wa pa magsugod ang bista. Pero nia na si Atty. Kevin Niego sulod sa husgado. Naghulat siya sa iyang kliyente nga si Pat Quilab. Unya nakita niya si Pat nga nagbarog sa may koridor. Nagsandig sa semento nga bongbong. Nilakang dayon si Kevin padulong sa pultahan pagawas sa husgado, aron makahinabi ang kliyente. Kay wa sila’y kontak sa selpon o ordinaryong telepono. Magkaistorya lang sila kun magkakita. Repasohon ni Kevin si Pat kay mosulti na siya pagsuporta sa ilang motion nga gipasaka.

Duha ka tuig na ang nilabay sukad naanular ang kasal ni Pat. Ang iyang kanhi asawa, naminyo na og Amerkano. Tua na’s America puyo. Unya nadala ang ilang duha ka anak nga mga dalagita. Sulod sa duha ka tuig, kada bulan gipahatan ang sweldo ni Pat isip Supervisor sa LDLY Corporation og P4,000 isip suporta sa duha ka anak. Gidiposito ni sa husgado. Wa nakobra sa mga anak. Kay tua na’s America. Ug haruhay na didto. Nikabat na og P96,000 ang maong kantidad. Nipalaban si Pat ni Kevin aron mawidro ang maong kantidad. Ug nisaad si Pat nga hatagan og katunga si Kevin isip acceptance fee ug attorney’s fees. Nisugot si Kevin kay gaan ra mang trabahoa alang niya. Unya kausa ra bistahon. Karong adlawa.

Dihang tua na’s koridor si Kevin, nahibulong siya. Nahanaw si Pat. Apan namasin siya nga niadto sa CR ang kliyente. Wa gyud nibalik og pakita. Nagsugod na lang ang bista. Gitawag ang kaso. “Your honor, puwede tawagon  og usab ang kaso karong taudtaod? Tua pa tingale sa CR akong kliyente,” ni Kevin.”OK, Recess for ten minutes,” sa huwes. Nitindog ug nibalik og sulod sa chamber. Naniga ang mga mata sa tulo ka babaye nga kuyog ni Atty. Henry Uphal. Nagbistida sila’g itom.

“Panyero, kinsay imong gipasabot nga tua pa’s CR?” ni Henry ngadtong Kevin. “Si Pat,” ni Kevin. Nangluspad ang tulo ka babaye. “Panyero, kay di man ikaw naggunit sa kaso sa annulment, ipaila ko nimo akong kliyente. Si Cherry, ex-wife ni Pat ug ilang duha ka anak. Sila’s Chona ug Concha” ni Henry nga nisenyas sa tulo ka babaye. Nagtupad ra sila’g lingkod sa lingkuranan sulod sa husgado. Wa may laing gibista rong adlawa. “Nice meeting you, madame, and girls” ni Kevin nga nipahiyom ug niyango sa tulo ka babaye. “Nganong niingon ka man nga tua pa’s CR si Pat?” ni Cherry. Seryoso. “Nakit-an man nakong nagbarog sa koridor ganiha” ni Kevin. Naminaw pag-ayo ang duha  ka dalaga. “Unsay iyang gisul-ob?” ni Cherry. “Barong nga dirty white, hushi” ni Kevin. “Mao man toy gisul-ob niya sa iyang haya!” ni Chona ug Concha.

“Ha!” ni Kevin. Nahugno siya. Di na siya kakuwarta sa iyang kliyente. “Naunsa man diay si Pat?” ni Kevin. “Na-stroke” ni Henry. “Kun wa pa siya namatay, pasagdahan na lang unta namong widrohon niya ang kuwarta. Kay naa sab gyod siya’y panginahanglan,” ni Cherry. “Wa gyud ko nasayod sa hitabo!” ni Kevin. Nanglimbawot ang balhibo. “Sige, iatras na lang nako ang motion” ni Kevin. “Salamat panyero. Pero nahago na ra ba ka. Cher, tagai si Atty. Niego og P4,000” ni Henry. Niabli si Chery sa iyang shoulder bag. Nikuot sa pitaka. Gidawat na lang ni Kevin ang consolation prize. “Bantog rang nanimahong kandila paggawas nako sa bupete ganiha!” tuaw niya sa hilom.