“Naa koy silingan, bay! Di motoo nga dunay Ginoo! Wa kono’y ebidensiya!†ni Owen ngadto’s iyang duha ka higala nga kainom niya atbang sa lamesa, nga sila si Manny ug Nerio. Naggunit na si Owen og punong baso sa serbisa. Bag-o lang tinagay ni Manny nga maoy nag-imbitar nilang Owen ug Nerio nga mamista sa ila.
Nia sila’s daplin sa karsada naglamisa sa baryo Yurupari di layo luyo sa munisipyo sa lungsod sa Alho. Nakakomentaryo si Owen karong udtoha kay trapik na kaayo sa highway atbang sa simbahan kay daghang namaligya og kandila, mga libro sa pangadye ug nobena ug mga rebolto sa mga santos. Silang tulong managhigala kauban nga nagtrabaho sa Archibichi Forwarders sa dakbayan. Puro sila freight clerks.
Kabugo sab anang imong silingan kun mao na iyang pangutok. Kadaghang butang nga nias kalibutan nga di mabuhat sa tawo. Mga ebidensiya na na. Kana sang distansiya sa adlaw ug kalibutan. Sa kainit sa adlaw, ang maong distansiya gitukma gyud nga ang kainit sa adlaw igo rang makapabunga sa mga tanom ug dili makasunog sa mga nias kalibutan. Kinsa may makahimo ana?†ni Manny.
Niyarok sa baso si Owen ug gitunol ang baso ngadtong Manny. Si Nerio wa katingog. Duna siya’y nakita nga nakabaling sa iyang tibook nga pagtagad. Nilingi si Manny ug Owen sa butang o binuhat nga gitutukan pag-ayo ni Nerio.
Nagkuros ang duha ka dalan luyo sa munisipyo diin sa usa ka eskina nahimutang ang balay ni Manny. Ang dalan nga naglatas sa amihan ug habagat ginganlan og Morales Street. Ang naglatas sa silangan ug kasadpan ginganlan og Enrique Street.
Ang balay ni Manny nahimutang sa eskina sa kasadpang habagatang. Sa silangang habig sa Morales Street nagbarog ang tawo nga bulingot kaayo. Nagpurol og guhayguhay na nga mora nag trapo. Ibabaw sa hawak wa siya’y sapot.
Tag-as iyang buhok nga sama sa kang Freddie Aguilar. Apan naglukotlukot na kini sa ka way atiman. Nagmapamapa ang tagiptip sa iyang lawas. Molakang panagsa ug hinay ang tawo. Apan duna siyay gikalingawan nga wa siya magpakabana sa mga tawo ug sakyanang nangagi.
Kun analisahon iyang gibuhat mora siya’g dunay gipuntingpunting. Mora siya’g naggunit og rifle o pusil nga taas nga di makita ug nagpunting sa unahan dapit sa habagatan. Usahay usa ka kamot (too) iyang gamiton nga mora’g duna siya’y targeton. Mora sab siya’g nagduwa og dart ug nagpuntingpunting sa bulls eye. Ug wa pa gyud kahukom nga buhian na niya ang dart.
“Ana ang buang man na sa Internet†ni Owen.
“Husto. Mao na siya akong nakita sa mga Facebook†ni Manny.
“Mamista sab kaha na siya. Lagyo gyud hinoon na siya’g lakaw. Makit-an nako sa Sogod, sa Catmon. Usahay gani sa Liloan†ni Owen.
“Nakit-an ko sab na siya’s Compostela ug Danao†ni Nerio.
“Gikuhaan na siya’g litrato sa selpon sa mga internet users.
Unya gihimoa’g mga dialogue sa facebook. Gi-e-mail sa tanang facebook users. Gikalingawan ang buang sa mga tarong og pangisip. Kinsa man kaha roy tinood buang ana?’ ni Manny.
“Ug mao nay lig-ong ebidensiya nga dunay Ginoo†ni Manny.
“Ngano god tawong pruyba man na siya nga may Ginoo?†ni Owen. Hunahunaa pag-ayo. Kun wa pay Ginoo, patay na nang buanga!†ni Manny.
“Yati ra?†ni Nerio.
“Giprotehean na siya’s Ginoo. Hunahunaa pag-ayo, hiuwanan siya, hiinitan, hitun-ugan, bisan asa lang matulog. Way tarong kaon. Makakaon og hugaw, pan-os, wa gyud masakit. Nakaingon ang Ginoo nga buang na siya. Kun iya pang hatagan og laing sakit, patay na gyud na†ni Manny.
“Di ba nag-ingon man ang Diyos sa Bibliya, nga “Ang gibuhat ninyo sa labing ubos kaninyo, gibuhat ninyo kanako?†ni Owen.
“Mao nay akong buot ipasabot. Ang Diyos naa sa pinakaubos nga tawo†ni Manny.
“Sa ato pa ang gibuhat sa mga internet users nga gihimong kataw-anan ang buang, gihimo nilang kataw-anan ang Diyos?†ni Nerio.
“Segurado. Mao nga ang nagpasiugda’g bugalbugal sa buang dunay kastigong mapaabot gikan sa Diyos†ni Manny. Nakapanakla si Owen ug Nerio.
“Ay sa kadiyot ha. Kay magputos ko’g kan-on ug sud-an. Akong tagaan ang buang†ni Manny nga nidali og biya sa lamesa. Nisulod sa ilang balay nga daghan na’g mga bisita.
Gisundan siya’g tan-aw sa duha ka higala. Niluta ang kabalaka sa ilang mga nawong. “I-delete to nako akong gihimong dialogue anang buanga†nagdungan sila si Owen ug Nerio og tabi. (Kataposan)