Maria Magdalena - Gula 226

“Ikaw sab, Bob,” nako pa. “Pag-ayoayo. Pag-amping sa imong pagbiyahe. Ug good luck. Magpaabot ko sa imong pagbalik.”

Sa didto na si Neggar sa gawas, kanunay ming magkontakay pinaagi sa cellphone. Kanunay ko niyang hatagan og update bahin sa iyang lakaw. Ug gimingaw na kuno siya nako.

Tungod kay milarga na man si Neggar, wala na ko’y problema sa higayon nga gustong makigkita si Bob nako. Makahimo na ko sa pagpakigkita kaniya bisan unsang orasa. Nga mosangko gyud kanunay sa usa ka mabugnaw’ng lawak.

Hangtod nga miabot ang panahon nga namugos si Bob nga makatultol sa akong gipuy-an sa Lapulapu. Panagsa na lang mi-mocheck in. Mokalit lang og tungha si Bob sa balay kun bation na niya ang lawasnong panginahanglan. Usahay dili magpahibalo mokalit lang og abot bisan layo ang iyang gipuy-an. Ug misamot pa kini dihang mibalhin siya og trabaho sa VECO, Cebu City.

Hayahay ang akong kahimtang. Gawas nga buhong ko sa materyal nga mga butang nga mapalit sa kuwarta, puno sad ko sa lawasnong kalipay. Kay bisan layo si Neggar kanako, makahigayon lang gihapon ko kay anaa man pud si Bob.

Nagpadayon ang relasyon namo ni Bob nga walay kasayoran si Neggar. Hangtod nga nakakat-on ko sa lainlaing matang sa sugal, kay sugarol man kaayo si Bob. Gisugdan ko na pagwaldas ang gipadala ni Neggar nako. -- Sumpayan pa