Manghilabot

Dear Tita Salie,

Maayong adlaw. Hinaot nga ganahan pa ka motabang kanamo nga dunay mga suliran. Ikaw gyud ang gihimo namong sumbonganan sa among mga problema labina kun kami maulaw mosulti niini ngadto sa among mga amigo ug amiga.

Ako si Jr., taga Lapulapu, kanunay gyod nga mobasa sa imong column kay makalingaw man kini and at the same time daghan pa gyod ang among makat-onan mahitungod sa tinuod nga kinabuhi. Kay dinhi sa mga suliran ako mang makit-an ang tinuod nga kinabuhi sa tawo.

Naa na koy anak 2 kabuok apan dili pa kasado. Wala pa ko’y kwarta nga magasto kun ugaling magpakasal mi sa akong partner tungod kay ang akong sweldo igo ra gyod pang konsumo sa pamilya.

Nitipon lang kami pagpuyo sa ginikanan sa akong partner, Tita, ug mao kini ang hinungdan sa akong problema. Kining inahan sa akong asawa manghilabot gyod kun unsay plano namo sa akong pamilya. Iya dayon babagan kun duna kami’y mahunahunaan nga alang sa among kaayohan. Unya kun madugay ko pag-uli gikan sa trabaho iya dayon kong dudahan nga dunay laing babaye, Tita.

Nahasol na gyod ko niya. Unsa may maayo nakong buhaton? Palihog pasabta ko, Tita. Daghang salamat and more power.

* * *

Hello, Jr.,

Duha na kabuok ang imong anak nganong wala pa man mo pakasal aron dunay bendisyon ang inyong relasyon. Imo pa bang hulaton nga molima na ang inyong anak una mo magminyo? Ayaw problemaha ang kwarta sa inyong kasal tungod kay lahi ang magpakasal lahi usab ang magkombira. Ug wala ka pugsa nga magkombira sa adlaw sa imong kasal. Dili ka hangyoon nga magpakaon, hinuon, ikaw gihangyo nga dapat kang magpakasal. Duola ang inyong parokya ug pangutana mahitungod og “mass wedding” kay libre kini nga kasal. Kun walay “mass wedding” ang inyong parokya pangutana kanila kun asang parokya ang duna niining programaha. Kining maong kasal alang kini sa mga nag-live-in pa apan gusto na nga magpakasal pero wala’y kwarta.

Pait gyod kaayo, Jr., ang mangipon ta sa atong ginikanan or uganan. Tungod kay puyde pa ka nila hilabtan kay naa kana sa ilang hunahuna nga tungod kay naa ka puyo sa ilang panimalay duna sila’y katungod ninyo. Nga puyde pa nila kamong but-an kun unsay inyong buhaton.

Mas maayo gyod nga maglain namo pagpuyo. Mangabang lang una mo. Bisan gamay nga kuwarto I’m sure malipayon mo kay duna man moy matawag nga inyoha diin ikaw ang hari ug ang imong asawa ang rayna. -- Tita Salie