Duha ka

Stage four na ang kanser sa utok ni Violeta--usa ka brain tumor nga nakalamay na sa tibuok bahin sa iyang utok, diin mibalibad na ang espesyalistang doktor sa utok nga nag-atiman niini. Gitagalan na ang nahabiling gutlo sa iyang kinabuhi.

Maoy hinungdan nga migawas na si Violeta sa usa ka pribadong ospital diin siya naadmit ug gigastohan gayud sa adunahan niyang mga ginikanan sa pamasin nga mamaayo pa ang iyang sakit. Anaa na lamang siya mag-istar sa ilang panimalay. Maghigda sa iyang lawak si Violeta ug usahay, agakon sa ilang duha ka katabang nga babaye paingon sa ilang balkonahe aron mohanggap og lab-as nga hangin.

May gihangyo siya sa iyang papa ug mama, lakip na sa iyang mga propesyonal nga upat ka mga igsuong lalake nga naminyo na. Siya ang kamanghurang anak nga sa edad nga 28, nagtrabaho nga usa ka accountant sa usa ka pribadong banko, tungod kay usa man siya ka CPA ug nagpabiling usa ka dalaga. Tungod sa kanunay na nga pagsuol sa kasakit sa iyang ulo, wala na makatrabaho si Violeta sa banko nga gialagaran.

“Gusto kong makita ang labing nindot nga butang nga inyong iregalo kanako, samtang makita pa nako ang tanan. Karon na ug ayaw ninyo’g ugma-ugmaa..!”

“U-unsay buot mong ipasabot, Violy?” puno sa kahingawa ang panagway sa iyang papa ug mama nga nagkadungan og sulti,

“Kay unsa may gusto mo diay, Violy...?” nagkadungan usab og pangutana ang upat ka magulang igsuong lalake ni Violeta, nga sa matag adlaw, kanunay nang mobisita kaniya.

Gibuhian ni Violeta ang lawom nga panghupaw.

“Kalagmitan gud,  inigtaliwan na sa usa ka tawo ibabaw ning kalibutan, anha pa mag-abot-abot ang mga matahom nga bulak ug butang nga iregalo gikan sa mga nagmahal kaniya. Apan anugon lang kaayo ug wa nay kapuslanan, kay dili na man kini makit-an sa hingtungdan! Ning gabhiona, ugma o sa sunod nga mga adlaw, dili ra ba matag-an nga moabot na ang tagal sa hinulaman kong kinabuhi...!”

“Ayaw pagsulti og ingon niana, Violy! I-ampo namo nga lugwayan pa sa Labaw’ng Makagagahom ang imong kinabuhi...! may kasubo ang panagway sa iyang mama nga mitutok kaniya.

Nagkatinan-away ang iyang mga ginikanan, lakip na ang iyang upat ka mga magulang igsuong lalake.

“Nagpahinumdom lang ko ninyong tanan, Pa, Ma ug mga Manoy ko. Karon na ug ayaw ninyo’g ugma-ugmaa ang mga matahom butang nga gusto ninyong iregalo kanako, samtang buhi pa ko, aron kapahimuslan pa nako sa pagtan-aw...!”

Nagyangoyango ang papa ug mama ni Violeta, ingon man ang upat niya ka magulang igsuong lalake. Natugkad nila ang buot ipalungtad ni Violeta. Natugkad nila. (Kataposan)