Gahum sa lumay

Gula 1

Sulagma nga nakaila ni Fernando ang usa ka tiguwang-lalaki nga nag-estar lang sa usa sa mga aseras dinhi sa dakbayan. Nadani ang pagtagad ni Fernando tungod sa sunod-sunod nga mga tawo nga makigsulti sa tiguwang.

Sugo sa pagkamaukit-ukiton, hinay-hinay si Fernando nga mipaduol sa nahimutangan sa tiguwang nga adunay gikasulti nga babaye. Naminaw usa si Fernando sa ilang gipanaghinabian.

Nagkatawa ug daw nahinangop kaayo ang maong babaye nga misugilon sa tiguwang nga epektibo kuno kaayo. Nagkatawa usab ang tiguwang nga naminaw sa pagsaysay sa babaye sa iyang kaagi.

“Unsay imo sir? Lumay ‘sab ang imong tuyo?” matud sa babaye nga nagngisi ngadto ni Fernando. Nakalitan si Fernando kay ang tinuod nagpalabay ra siya sa oras kay aduna siya’y gipaabut.

Gisakyan ni Fernando ang pagpangutana sa babaye. “Lumay, naa diay? Kanindot ana gud.” Mingisi ang babaye ug mitudlo sa tiguwang-lalaki nga iyang gikahinabi. “Pangayo ni Tatay, aron masuwayan nimo, dili g’yud na bakak,” matud sa babaye.

“Basta kining akong lumay wala g’yuy magmahay. Sigurado g’yud nga malukmay nimo ang babaye nga imong magustohan,” matud sa nagkangohal na nga sinultihan sa tiguwang.

Gitug-anan si Fernando sa babaye nga personal niya nga nasuwayan ang lumay sa gitawag niya’g Tatay. Ang langyaw nga iyang gisuwayan paglumay nagsige na lang og sunod-sunod kaniya ug iya g’yud nga “natilawan.”

Sa pagsukit-sukit ni Fernando iyang nahibaw-an nga “lana” nga hinimo sa tiguwang ang lumay.

“Paghiran ra nimo ug gamay’ng lana ang filter sa sigarilyo og kon ang tawo nga imong lumayon makahanggap na sa asu, taud-taud malukmay na siya nimo,” matud sa tiguwang.

Nagduha-duha pagtoo si Fernando sa gisulti sa tiguwang apan ang babaye mimatuod gayud sa kaepektibo sa lumay. Nakapahiyom si Fernando nga naghuna-huna apan ang problema kay dili siya manigarilyo.

“Kinahanglang manigarilyo ka g’yud aron mahanggap sa imong lumayon ang lumay,” matud sa tiguwang. Mibiya si Fernando sa nahimutangan sa tiguwang apan wala mahanaw sa iyang huna-huna ang lumay.

Pagkaugma, gibalik ni Fernando ang tiguwang didto sa aseras nga iyang giestahan. Swerte kay wala’y laing tawo nga didto. “Tay, mibalik g’yud ko kay naikag ko sa giingon nimo nga lumay.”

Mingisi ang tiguwang. “Dili ka g’yud magmahay sa akong lumay Dong.”

“Ang problema lang kay dili ko motabako Tay. Wala ba’y laing paagi nga magamit nako ang lumay nga dili lang ipaagi sa pagpanigarilyo?” gisukna ni Fernando ang tiguwang.

“Buyno, ikaw ra ang akong hatagan og special nga paagi. Ang imong pahumot butangi aning akong lumay aron ang babaye nga imong magustohan nga makahanggap sa imong perfume imong malumay,” matud sa tiguwang. - Sumpayan