Dear Tita Salie,
Have a a wonderful day. Just call me Niña, still single ug nagtungha pa. And my problem is all about my lovelife.
Naa koy boyfriend, Tita, nga si Lee, love kaayo nako siya ug love pud ko niya ako ni siyang classmate, Tita. Ug halos tanan sa akong classmate nasayod na sa among relasyon. Kanunay ming sogsugon nila hasta ang among mga teachers moapil og sugsog namo.
Unya ang usa ka classmate namo misulti nako nga dunay naibog nako nga amo ra usab nga classmate. Ug akong nasayran nga ang ako diay nga laing crush ang naibog nako, Tita.
Karon ang among relasyon sa akong uyab nagkaanam og ka wala’y klaro tungod kay dili na man pud siya makig-estorya kanako sama kaniadto.
Unsay akong buhaton, Tita, nga nawagtang na man pud ang akong pagbati ngadto sa akong uyab? Ako na lang kaha siyang bulagan? Palihog pasabta ko. Thank you very much and more power.
* * *
Dearest Niña,
Akong nakita sa inyong kinabuhi karon ang akong kinabuhi kaniadto dihang nagtungha pa lamang ako sa high school. Anaa gyud ang tupotupo ug sugsog nga matinuod gyud kay mora man pud ma-develop ta tungod sa sugsog.
Ako mismo muingon kanimo nga usahay ang atong gibati nga mora og gugma nga nitubo pinaagi sa ilang pagtupotupo dili diay tinuod ug mawagtang ra kini. Kay ang kasingkasing motug-an gyud sa tinuod kun kinsay iyang gipitik. Busa ayaw paglibog sa imong gibati karon kay natural lang kana. Seguro lang dili ka satisfied sa time nga gihatag sa imong boyfriend diha kanimo. Seguro nangita ka og laing excitement sa kinabuhi kay matud mo nga dili na kaayo motagad ang imong boyfriend kanimo.
Ug bisan pa man kun anaa pa ang ilang tupotupo ug sugsog apan wala nay active nga gibuhat ang imong boyfriend mawagtang gyud ang imong excitement hinungdan nga nawad-an ka usab og gana kaniya.
Busa kun sa imong tan-aw wala nay klaro ang inyong relasyon mas maayo seguro kun mag-estorya mo sa imong uyab nga inyo na lang putlon aron wala kanay hunahunaon. Apan ako lang tambag kanimo nga ayaw paapekto sa imong lovelife aron dili maguba ang imong pag-eskuyla. -- Tita Salie