Short term memory
Bilib si Atty. Serge Hungid, 50 anyos kang Atty. Orly Relado, 83 anyos. Kay ang naulahi kamao mo-teks sa selpon. Ang nauna dili kamao. Kay way ganang makat-on. Magsalig lang si Serge sa iyang kapikas nga maoy iyang sekretarya. Maoy iyang paguniton sa selpon ug diktahan sa ipa-teks kun dunay mo-teks niya.
Nagkahigala ang duha ka abogado kay sulod sa upat ka adlaw nga MCLE Seminar sa miaging bulan, nagkatupad sila’g lingkuranan. Ang nakaapan lang ni Atty. Relado, kay may pagkalimot na siya.
“Panyero, may higayon gyud nga usa ka buntag, nanaug ko’s akong bupete kay muadto na sa husgado. Unya pag-abot nako sa daplin sa karsada aron mag-atang og sakyanan, nalimot ko’g unsay akong gibuhat sa daplin sa karsada,†ni Atty. Relado nga nagkatawa. Nikatawa na lang sab si Serge. “Ang kuyaw kun gikan ka sa CR, unya malimot ka’g sul-ob balik sa imong karsones human mitubag sa sugo sa lawas,†ni Serge. “Simbako lang sab. Palayo lang na nga di na mahitabo nako,†sa tiguwang abogado. Maayo pa siya’g pandungog.
Taga-Dumaguete si Atty. Relado. Tua sab didto iyang bupete. Paghuman sa seminar, nagbaloay og tarheta ang duha ka abogado. Unya, usa ka buntag sulod sa bupete ni Serge, ning dakbayan, mitingog iyang selpon. May ni-teks. “Tan-aw ra San kinsa nang ni-teks nako?,†ni Serge ngadto sa iyang kapikas nga si Susan atbang sa iyang lamesa, dungan sa pagtunol sa selpon. “How are you now, Serge?,†teks sa pikas selpon. Gikan ni Atty. Relado. Gipabasa ni Susan sa kapikas. “Tubaga ingna I’m fine. Ug thank you for asking,†ni Serge. Gipindot ni Susan ang selpon ni Serge aron pagbalos sa teks.
Dangta’g pila ka minutos, mitingog ang selpon ni Serge. Gibasa ni Susan ug Serge ang mensahe,†who is this?,†sa screen. Naglumba’g pangatawa ang bana’g asawa.
“Ayaw na lang na siya tubaga. Kay di gyud mo magkasinabot,†ni Susan nga nagkatawa lang gihapon. Hilom nga gibati’g kaluoy si Serge sa tiguwang abogado. Duna na gyud siya’y kanang gitawag og short term memory. (Kataposan)
- Latest
