Gamay’ng kalibutan

Gula 5

Gikulbaan si Ricky nga wala na niya makita pa si Diane sa ilang gipuy-an. Misamot ang iyang kakulba dihang nakita ni Ricky nga wala na ang mga sinena ni Diane sa ilang tukador.

Nakasabot si Ricky nga gibiyaan siya ni Diane. May suwat nga nakit-an si Ricky nga diha sa gamay nila nga lamesa. Gipunit dayon ni Ricky ang papel ug gibasa.

Sa maong suwat nangayo’g pasaylo si Diane ug gipasabot nga mangita siya’g trabaho aron makatabang kang Ricky. “Pagbasa nimo niini dia na tingali ko sa lawod Ricky kay mangita ko’g trabaho.”

Midanguyngoy si Ricky. Halos gihurot niya ang iyang mga luha sa paghinilak. Wala mutrabaho si Ricky pagkaugma. Nakasabot siya nga wala na makaantos pa si Diane sa ilang kalisud. Milabay ang pipila ka buwan sa kamingaw ni Ricky nga nag-inusara. Nagtigum siya’g kwarta kay aron pangitaon niya si Diane. Nakasabot siya nga duna siya’y pagkuwang kang Diane tungod kay wala siya makahatag og kaharohay sa ilang pagpuyo.

Usa ka adlaw, may tawo nga miabut, kawani sa Express Forwarder. Nakugang si Ricky kay giingnan siya nga may gipadala kaniya nga kwarta ug ipakuha sa ilang opisina.

Nahibulong si Ricky kun kinsa ang nagpadala kaniya’g kwarta. Paingon sa trabahoan, gihapit ni Ricky ang Express Forwarding office. Sagol kalipay ug kaluoy ang iyang gibati. Si Diane ang nagpadala kaniya og P2,000 ug suwat nga nangayo’g pasaylo.

Wala motug-an si Diane kun asa siya mahimutang apan sa pakisusi ni Ricky iyang nasayran nga gikan sa Cebu City ang nagpadala. Nakahilak si Ricky nga naghuna-huna ni Diane.

Giapil ni Ricky pagtigum ang kwarta nga gipadala ni Diane kaniya aron gamiton sa pagpangita niini sa dakbayan sa Sugbo. Milabay ang mga adlaw. Gikakita ni Ricky ang usa ka amigo nga si Peter.

“Gikan ko’s Cebu bai. Ayaw kalain ha, ang imong asawa nakit-an nako nga nagtrabaho sa Wild Orchids bar sa Cebu. Wala na lang ko magpaila niya kay nakalimot na tingali siya nako,” giingnan ni Peter si Ricky.

“Ha? Mao ba bai Peter? Sa ato pa, nag-waitress si Diane?” ni Ricky pa nga ingon sa wala mahimutang. “Medyo ingon ana nga trabaho bai. Dihang nakit-an nako may katibol siya nga lalaki ug seksi na kaayo si Diane,” dugang ni Peter.

Gihuwat ni Ricky ang tingsweldo aron mularga siya paingon sa Sugbo. Nakahukom si Ricky nga biyaan ang iyang pagka panadero sa bakery kay mao kini ang nakaingon sa iyang kahimtang.

Lawom kaayo ang paghanduraw ni Ricky samtang naglawig ang barko paingon sa Sugbo gikan sa Zamboanga. - Sumpayan