Pagsulay sa kinabuhi Gula 7

Nakalitan si Terio sa kalit nga pagtunga ni Bella nga talilarga na ang barko. Wala siya masayud unsay buhaton karon nga nagpakilooy si Bella kaniya nga dili kini talikdan.

“Pasayloa ko Ter, gisupak nako ang imong kagustohan apan I still love you,” matud ni Bella nga naghilak. Kalit misantop sa huna-huna ni Terio ang pagsanong ni Bella nga ipakuha sa iyang mga ginikanan ang iyang gisabak.

Alang kang Terio usa kini ka daku kaayo nga sala nga nahimo ni Bella. Mipasunding usab sa iyang kaisipan ang pagpasakit ni Bella kaniya dihang wala kini motagad  sa iyang mga pagsuway nga magkaduol sila.

Miginhawa’g lawom si Terio. “Sori kaayo Bella, pasagdi na ko. Tumanan ko ikaw sa imong tinguha nga magkalagyo kitang duha. Mopauli ko sa Mindanao bawon ang kagul-anan ug kapakyasan sa akong gugma kanimo.”

Giduol si Bella sa opisyal sa barko ug miawhag kaniya nga manaug na kay isaka na ang hagdan sa barko. “Sakit kaayo ang gihimo nimo kanako Bella. Daghang mga adlaw nga imo ko nga gipaantus,” pintok kaayo ang mga pulong nga gibuhian ni Terio.

Wala’y hunong ang paghilak ni Bella bisan og giubanan na siya sa second mate sa pagpakanaug sa barko. Daw nakakita og salida sa television ang mga pasahero nga nagtinabangay pagtutok ni Terio.

Taud-taud, mitingog ang call alert sa selpon ni Terio. Luya niya nga gikuot ang selpon gikan sa bulsa sa iyang T-shirt. Napasiga ang iyang mga mata kay si Cynthia ang nanawag kaniya.

“Hello.” Daw nagkurog ang tingog ni Terio nga mitubag. Wala siya masayud nganong nanawag si Cynthia nga nasuko man unta kini kaniya. “Mi-leave g’yud diay ka? Wala g’yud ka mananghid nako Ter,” daw subo ang tingog sa batan-ong engineer.

Gipasabot ni Terio nga wala na lang siya moduol kay nagtoo siya nga gikasuko ni Cynthia ang iyang text message sa miaging gabii nga daw nanguyab.

“Wala ko masuko uy, apan gusto lang nako nga litukon nimo kini sa personal g’yud ug dili kay pinaagi lang sa text message,” pasabot ni Cynthia.

“Mao ba Cynth? Buyno, I love you,” nakapahiyom si Terio nga may nalantawan na nga kadasig. “I love you too Ter. Pagdali’g balik diri sa Cebu kay para magkauban na ta. Anugon nga milarga ka nga wala ko maka-kiss nimo,” paraygon kaayo ang tingog ni Cynthia.

Gisaaran ni Terio si Cynthia nga mobalik dayon siya sulod lang sa pipila ka adlaw aron dimdimon nila ang katam-is sa gugma. “Bantay ka bitaw. Maghuwat baya ko sa imong pagbalik ba?” misamot kaparaygon ang tingog ni Cynthia. - Kataposan