In-Love Gula 7

Wala pa’y alas nueve sa buntag didto na si Avel sa apartment nga gipuy-an ni Welyn. Nahulma sa dagway ni Welyn ang kalipay pagkakita niya nga miabut na si Avel. Gani gisugat niya’g tam-is kaayo’ng pahiyom ang bisita.

“Lingkod... maayo kay wala g’yud ko nimo pakyasa Avel,” paraygong tingog ni Welyn nga miabi-abi sa ulitawo. Nakapahiyom si Avel sa maabi-abihon nga pagtagad ni Welyn kaniya.

“Nakapalit na ko’g atong makaon mao nga mahiubos g’yud unta ko nimo kun wala ka pa moanhi,” ni Welyn. Nasabot ni Avel nga mapinanggaon diay kaayo si Welyn. Abi baya niya kaniadto og maldita si Welyn.

Nakabantay si Welyn nga may gihuna-huna si Avel. “Nganong mora’g naghinuktok ka Vel? Nagmahay ka nga miari?” matud ni Welyn nga nagngisi. Abtik kaayo nga nakapamalibad si Avel.

“Aw wa uy, nahuna-huna ra nako nga kasuwerte kaha sa imong boyfriend no kay mapinanggaon ka man kaayo,” ni Avel pa nga mora’g miwitik og gamay pagpahinumdom ni Welyn sa iyang pagbati. Mipahiyom si Welyn ug mitutok kang Avel. “Mao bitaw nga gipaari g’yud tika aron akong atimanon? Dili ka diay gusto nga akong panggaon?” ni Welyn pa nga daw mipaagi lang sa komedya.

Ingon sa salabtunon kaayo ang gisulti ni Welyn. Naglibog si Avel kun may pagbati ba ‘sab kaha kini kaniya. Nagtinutokay sila’ng duha ug ingon sa nagsultihanay ang ilang mga tinan-awan.

Mihabol kanila ang kahilom sulod sa pipila ka mga segundos. Mao na la’y naalinggatan ni Avel nga anam-anam niya nga giagbayan si Welyn. Sa unang higayon migakus si Welyn kang Avel.

“Na-miss baya g’yud ko nimo Vel. Dili ko kasabot sa akong gibati nga wala na kita magkita,” paraygong tingog ni Welyn. “Ingon ‘sab ko niana Welyn, gimingaw kaayo ko nimo, because I love you,” matud ni Avel.

Wala makapugong si Avel ug iyang gihagkan si Welyn. “I hope nga dili ka mahisama sa akong first boyfriend nga nangita pa’g lain nga babaye,” giingnan ni Welyn si Avel.

Gipasaligan ni Avel si Welyn nga lahi siya sa una niining boyfriend. Malipayon kaayo ang duha ug nagdungan sa pagpangaon. Human nila’g kaon, paraygon kaayo si Welyn nga nakigsultihanay kang Avel.

Gisubli nila ang makabuhong nga pagparayganay. Sila ra’ng duha sa apartment mao nga wala sila’y pupanagana sa ilang mga lihok. Daw mobuto na ang pus-on ni Avel sa grabeng kahinam samtang naghapyud-hapyud sa hamis kaayong mga paa sa dalaga.

“Pagka suwerte nako Lyn,” matud ni Avel nga padayong mipabatyag og kalalim sa guwapa niya nga girlfriend. “I’m in love with you Avel,” matud sa paraygon na nga si Welyn. - Kataposan