Abig makalimtan

Dear Tita Salie,

Maayong adlaw kaninyong tanan ug labina kanimo among gwapa ug buotan nga magtatambag, Tita Salie.

Tagoa lang ko sa ngalan nga Mary, dalaga ug tigbasahan gyod sa imong column, Tita. Malingaw ko sa mga problema nga gipadala tungod kay ako man gyong masabtan ug makit-an ang tinuod nga kinabuhi sa tawo.

Ang akong suliran kabahin kini sa akong kinabuhi karon uban ang akong ex ug present boyfriend. Tungod niining mga tawhana naglibog na hinuon ko sa akong kinabuhi karon.

Akong gibulagan ang akong boyfriend, Tita, tungod kay na-involved man siya sa laing relasyon. Sa laktod nga pagkasulti duna siya’y lain. Bisan tuod sakit alang kanako nga mawala siya, tungod kay love kaayo nako siya, apan ako lang gyod kining giagwanta kay dili ko gusto nga iyang ilaron.

Paglabay sa 1 kabulan sukad nga nagbulag mi duna ko’y nakaila nga lain lalaki. Nanguyab siya nako, ug aron ko malingaw ug makalimtan ang akong pait nga kasinatian akong gisugot. Apan nasayop diay ko, Tita, kay hangtod karon love lang gihapon nako ang akong ex ug dili nako siya makalimtan.

Wala man gyod ko’y gugma niining akong uyab karon apan love kaayo ko niya ug dili nako gusto nga masakitan siya. Unsa may akong buhaton, Tita? Palihog pasabta ko. Daghang salamat and more power.

* * *

Dear Mary,

Ang imong sitwasyon mohatag kanimo ug usa ka leksyon ug sa uban usab nga nakabasa niining imong problema, nga kun modesisyon ta dapat tungod kini sa husto ug sakto nga rason. Kun imong dawaton ang tawo nga nanguyab kanimo kana tungod kay nahigugma ka kaniya. Ayaw sugta ang usa ka lalaki kun maoy imong rason ang pagkalimot sa bangungot nga imong nasinati, o makalimtan ang tawo nga gusto nimong dili na mahinumduman kay dili gyod kini mahitabo. Sama ra nga ang kauhaw sa tubig  dili mawagtang bisan unsa pa ang imong giinom hangtod nga imong mahatagan ang imong lawas sa butang nga iyang gipangita.

Luoy lamang ang tawo nga imong gigamit kay nagdahom gyod siya nga duna kay gugma kaniya kay imo man siyang gisugot. Maoy anaa sa iyang hunahuna nga nahigugma ka niya. Ug mas samot pa gyod siyang makaluluoy kun malooy kang mosulti kaniya ug ipadayon ang bakak nimong gugma.

Busa lig-ona ang imong kaugalingon ug sultihi siya sa tinuod nimong gibati kun tinuod kang naluoy kaniya. Ayaw na usab hinumdumi ang imong ex aron padayon na nimo siyang makalimtan. Pangita og laing kalingawan pinaagi sa pagtrabaho aron ma bisi ka ug makalimot ka kanila and at the same time imo pang matabangan ang imong pamilya. -- Tita Salie