Rosalie Vallecera

Pagkaugma, mikuyog gyud ko ni Bob ngadto sa siyudad aron pagpakigkita sa iyang suking palitanan ug ginadiling drugas!

Sa akong kaugalingong paghimo’g assessment sa akong binuhatan, mas grabe na ang akong pagpaulipon sa dautang bisyo karon kay sa kaniadto. Kaniadto, sa sexual pleasure ra ko nagpaulipon. Apan karon nagumon na ko sa bisyo sa ginadiling drugas. Grabe na ni! Mibati na ko og kakulba.

Usa ka higayon niana, nananghid si Bob nako nga muadto siya sa Norte, adto sa Bogo, Cebu. Kay dunay seminar didto mahitungod sa paggamit sa kuryente. Ug usa siya ka semana kay upat ka lungsod ang ilang adtoon. Sa wala pa molarga si Bob paingon sa Bogo, gitagbaw una namo ang among kaugalingon pagtagay sa lawasnong kalipay.

Samtang didto si Bob sa Bogo, mibalik ko sa akong naandan nga lingawlingaw ang pag-internet aron pagpukan sa kalaay. Nag-open ko sa akong facebook aron ma-check kun unsa nay update. Magdula sab ko og farmville usahay.

Sa internet nakakaplag ko’g bag-ong diversion sa kinabuhi. Bag-ong kalingawan. Bag-ong paagi sa pagpatay sa mga oras sa kalaay. Nalingaw ko sa pagpakig-chat sa lainlaing mga personahe nga nailhan ko lang sa ngalan nga akong nakaplagan sa facebook.

Sa facebook akong nahimamat ang akong classmate kaniadto sa CIT nga mao si Neggar. Sa iyang pagpaila nako, usa na siya ka engineer. Ug anaa siya sa planta sa San Miguel. -- Sumpayan pa