Nakit-ang dunay kauban

Dear Tita Salie,

Maayong adlaw kaninyong tanan nga nagsunod sa lindog ni Tita Salie, and of course kanimo nga among magtatambag, hinaot nga walay kakulian sa kinabuhi nga imong giatubang aron malipayon ka karon.

Tagoa lang ko sa pangalan nga Izah, usa ka dalaga. Nagproblema gyod ko sa akong kasingkasing, Tita, tungod kay nahigugma ko sa duha ka lalaki. Duha kabuok ang akong uyab karon ug naglibog ko kun kinsay akong pilion, nga pareho man silang bug-at sa akong dughan.

Nahigugma gyod ko nilang duha, Tita. Apan wala sila masayod nga duha sila kabuok sa akong kasingkasing karon. Apan dihay usa ka higayon nga nakit-an ko sa akong uyab nga dunay laing kuyog nga usa ka lalaki. Ug mao kadto ang usa nako ka boyfriend.

Dihang gipangutana ko niya kun kinsa kadtong akong kauban ako lamang siyang giingnan nga ako kadtong amigo. Maayo na lang kay mituo dayon siya sa akong gisulti kaniya.

Nahadlok nako, Tita, nga masakpan nilang duha nga duha sila kabuok nga akong uyab. Mao gyod kini ang nakahasol nako. Nakahuna-huna ko nga bulagan na lang ang usa. Apan kinsa man nila ang akong pilion? Palihog pasabta ko, Tita. Thank you so much and may God bless you.

* * *

Ayaw kalimti nga dunay panultihon nga nag-ingon “walay asong makomkom”.  Bisan unsaon nato og tago sa usa ka tinagoan moabot gyod ang panahon nga kini mabutyag ug mahibaw-an sa uban. Busa kun ikaw dunay baho nga gitagoan pangandam aron dili ka magbasol kun kini mabutyag ngadto sa uban.

Dili gyod maayo ang mosunod sa ilang giingon nga “collect and select” labina kun ikaw usa ka babaye. Kun ang lalaki ang daghan og uyab, mora’g okey ra ug dili kaayo dako nga isyu. Tungod kay nasayod na kitang daan sa batasan sa usa ka lalaki. Ug dili usab maguba ang iyang image kun ato siyang makit-an nga nakigkuyog sa lain-laing babaye. Gani ang uban proud pa kun sila nakauyab og daghan.

Apan lahi kaayo kun sa babaye kini mahitabo lahi na ang atong hunahuna kun ato siyang makit-an nga nakigkuyog og lain-laing lalaki. Usahay dili pa nato mapugngan ang paghunahuna nga usa siya ka babayeng dili kasaligan, daghan og nawong ug bigaon.

Ato na lang kining dawaton tungod kay mao kini ang kultura natong mga Pilipino. Dili maayo sa panan-aw kun ang babaye lain-lain ang kauban nga lalaki.

Busa ayaw na lang gyod ipadayon ang imong nasugdan kay tingali unya kun moabot ang panahon nga imong gikahadlokan ug masakpan ka sa imong mga hinigugma. Puy-i ang kinabuhi nga limpyo ug respetado. Likayi ang mga buhat nga makapaguba sa imong pagkatawo. -- Tita Salie