Maria Magdalena Gula 173

Pagkasunod gabii mibalik gyud si Bob sa balay. Sa sinugdan, ang akong Mama maoy iyang gihinabi. Dihang nahuman na ang akong gibuhat sa kusina, miadto ko sa sala aron pag-entertain kaniya. Si Mama mibiya sa sala aron paghatag og privacy namo ni Bob.

Miligdong dayon ang panagway ni Bob dihang nagkaatubang na kami. Dili na sama sa nakalabay nga gabii nga bisan unsa lang ang among gihisgotan. Niining gabhiona, mao nay nasentro sa among panagkabildo ang butang nga may labot sa kasingkasing. Nangulitawo na si Bob nako.

“Nganong ako man gyud ang imong gipanguyaban?” Gipangutana ko si Bob aron pagsuta sa kamatinud-anon sa iyang pagpaninguha nako. “Nasayod ka baya nga buwag ko sa akong bana. Nganong dili man ang usa ka pure nga dalaga maoy imong pangulitawhan? Usa pa mora’g magulang baya ko nimo og pangidaron.”

“Dili katudloan ang kasingkasing, Maria,” matud ni Bob. “Ikaw ang akong gihigugma.”

“Are you sure nga love gyud kana? Kanang imong gibati nako?”

“Nakaseguro ko. Karon lang ko nibati og ingon niini.”

Wala ko motingog.

“May paglaom ba ang akong gugma, Maria?” misukna si Bob pagkilab sa pipila ka daklit. Wala ko motubag. Naglibog ko kun unsay akong itubag kang Bob. Pero sa hilom, kasugtonon na ko niya!

“Tingali unya’g kataw-an ka sa imong mga higala kay ako ang imong uyab.”

“Andam kong ipaglaban ang atong gugma, Maria.” -- Sumpayan pa