Linog

Wala kapugngi ni Lauro ang paghilak tungod sa pagkaguba sa iyang balay. Asa na siya karon mopaingon nga maayo man gayod nga pagkaguba sa iyang balay nga nasunod pa niya gikan sa iyang mga ginikanan.

Nag-inusara na lang si Lauro nga nagpuyo sa ilang balay human motaliwan ang iyang mga ginikanan tungod sa mapait nga trahedya nga nahitabo niadtong bagyo nga Sendong sa milabay’ng duha na ka mga tuig.

Pagka demalas sa iyang kinabuhi apan wala siya’y mahimo kun mao kana ang hampak sa kapalaran. Maayo na lang gani kay niadtong bagyong Sendong, naluwas siya pinaagi sa pagkapyot sa usa ka batang samtang mikusog ang   bul-og sa suba.

Apan ang iyang mga ginikanan, wala na gayod niya makita. Maayo na lang kay dunay hinabang sa gobyerno nga gihatag kaniya busa sa iyang paningkamot, nahibalik ang iyang pinuy-anan. Ug karon ania na usab kining linog nga maayo gyod ang pagtama sa iyang pinuy-anan. Hinuon, dili lang ang iyang balay ang nangadaot  ug ang labing sakit sa tanan, kay grabe gayod ang kadaot sa iyang kaugalingon.

“Nganong siya pa man ang nahitaboan sa ingon,” tuaw niya sa kaugalingon. “Nganong siya pa man nga usa man unta siya ka tawong kabos?”

Wala man gani intawon si Lauro makatapos sa pagtuon bisan diha sa elementarya tungod lagi sa kakabos sa iyang mga ginikanan. Maayo na lang gani nga sa iyang pagtungha kaniadto, naay iyang iyaan nga miabag kaniya kaniadto kay kun wala pa, segurado nga dili gayod siya makatungha sa eskuwelahan.

Daghan ang nabiktima sa maong linog. Ang mga kabos sama kaniya, mao gayod ang grabe nga naapektohan, nga ang iyang balay daw gikumot sa makusog nga pagtay-og sa yuta. Maayo na lang kay dihang nahitabo ang paglinog, wala siya sa ilang balay kay didto siya sa balay sa usa ka higala nga mitambong sa usa ka salo-salo isip nagsaulog og usa ka adlaw’ng natawhan.

Tungod lagi kay usa man siya sa mga biktima, miadto siya sa buhatan sa ilang mayor aron mangayo siya’g hinabang kay asa man intawon siya’g pagkaon kun dili siya matabangan. Maayo ang ilang Mayor busa mipasalig kini nga tabangan sila sa ilang problema ilabi na gayod si Lauro ug uban pang mga kabos nga mga tawo nga apektado sa trahedya.

Dinhi, makaingon si Lauro kun asa man diay ang gahom sa Kahitas-an. Nganong siya pa man gayod ang gisilotan. Naay mga tawo nga nagpuyo sa kaharuhay, nindot ang dagan sa ilang kinabuhi, unya wala sila mahiagom sa silot. Nganong siya pa man ug nganong dili man ang uban? (Kataposan)