Magul-anon kaayo

Dear Tita Salie,

Hello! Ako si George, 21 anyos na  ug ulitawo. Gusto lang unta ko mangayo sa imong tambag kun unsay akong buhaton. Nasakitan man god ko sa akong kasingkasing tungod sa akong girlfriend.

Naa man gud ko’y naibgan, Tita, nga usa ka babaye. Ug bisan tuod kung perting kuyawa ako gyod siyang giulitawhan.Ug maayo na lang gani kay wala ko niya pakyasa ug iya kong gisugot.

Abi gud nimo, Tita, siya ang akong unang uyab sa tibuok nakong kinabuhi. Busa perti gyod nakong lipaya dihang iyang gidawat ang akong gugma. Akong gipakita kaniya kun unsa gyod nako siya ka love ug tanan nakong kayang buhaton ug gihatag ako gyong gihatag kaniya.

Apan paglabay sa pila ka bulan wala na man siya mo-reply sa akong text. Dili na usab motubag kun akong tawgan. Hangtod nga ako na lang nadunggan nga duna siya’y laing uyab. Busa dihang nagkita mi ako siyang gipangutana kun tarong ba siyang babaye. Matud niya “dili ug ayaw ko pagbut-i.”

Niuli na lang ko nga magul-anon, Tita, ug wala ko masayod unsay sunod nakong buhaton. Palihog pasabta ko. Thank you so much.

* * *

Dearest George,

Tinuod nga dili gyod siya maayo nga babaye. Sayang lang kay siya ang natingban sa imong unang gugma. Pero ang panghitabo ayaw panghinayangi kay ang importante nibati ka niini. Gawas sa pagbati pasalamati usab tungod kay  at least duna kay nakuhang leksyon nga sa pagpanguyab diay kinahanglan gyod nga imong ilhon ang tawo una nimo siya higugmaon. Dili sama sa uban nga duna nay nahitabo kanila pero wala pa sila magkaila.

So, ang courtship gud gimugna kini aron atong mahatagan ang usa’g-usa og kahigayonan nga magkailhanay. Busa atong gamiton ang panahon, nga magkaila mo pag-ayo sa maong tawo una mo modiga sa inyong mga gugma. Niining paagiha magkailhanay gyod mo pag-ayo ug malikayan ang sitwasyon nga pananglitan,  usa pa sila nasayod nga cousin diay sila dihang uyab na sila ug may nahitabo na. Tungod gyod kini kay kuwang ang time sa pag-ilhanay, kay ang mga tawo karon kanunay nga nagdali.

Mas maayo gyod nga sa sunod nga higayon imong ila-ilahon pag-ayo ang babaye nga imong higugmaon. Tan-awa ang iyang batasan kun kaya ba nimong pakisamahan. Kay kun medyo lisod siya sabton, nganong imo pa man nga ipadayon. -- Tita Salie