Kalooy ni papa

“Ma, gisugo ko ni papa nga ipakuha ka. Papaulion ka niya. Di na siya katoo nga seminar imong gianha sa Negros. Usa ka bulan na kang wa niuli”, teks ni Amparo sa iyang inahan nga si Charito. Kasamtangang nagsakay si Amparo og traysikol karong buntaga. Aron moadto sa pantalan para Dumaguete.

Dugay na siyang nakasabot sa iyang inahan nga dunay laing lalaki. Singkwenta na man unta kapin iyang mama. Apan bigsa pa kaayo. Wa na siya’y gugma sa iyang Papa Zoilo. Di lang si Amparo gustong magubot iyang pamilya. Maong wa lang siya nisumbong sa iyang papa.

“Sultihi na lang si papa nimo nga di na ko mopauli. Duna ko’y kaipong laing lalaki” tubag teks ni mama niya nga nabasa ni Amparo sa iyang selpon. Gihilasan siya’s iyang mama.

“Ikaw ang angay mosulti ana ni papa. Gawas pa, kaslonon ko sunod bulan. Dapat ipaso una ko ninyo sa altar. Kun makigbuwag ka ni papa, unya na. Human sa akong kasal” teks ni Amparo sa iyang mama.

Ang kabuotan sa iyang papa, giabusohan sa iyang mama. Bisa’g traysikol drayber lang iyang papa, haruhay sila. Kay way bisyo iyang papa. Nakapahuman og kurso nilang duha ka managsoon. Iyang Manoy Leo nakahuman og Accountancy. Siya nakahuman og BS Psychology. Iyang mama kawani sa opisina sa Tasador sa ilang lungsod sa Samboan. Nipasangil lang sa iyang papa nga mutambong og seminar. Unya ang tinuod, nag-indefinite leave.

Kuragan gyud iyang mama. Ikaduha na ni niyang kuyog og laing lalaki. Sa unang higayon, gipasaylo iyang mama sa iyang papa. Apan karon, nabalaka si Amparo nga basi’g hidapatan na iyang mama sa iyang papa. Lima ka tuig na ang nakalabay, napusilan iyang maguwang. Patay. Way nadakpang suspek. Way nakasuhan. Nagtoo si Amparo nga kastigo to sa iyang mama nga nagluib sa kapikas. Kay daghan siyang nailhan nga palekerong mga bana. Namatyan og mga anak. Sa ilang pamilya, iyang mama ang palekira. Gikastigo sa Diyos. Maoy pagtoo ni Amparo.

“Sige. Kuhaa lang ko diri. Unya, inig uli nato, sultihi la’s papa nimo nga mga kauban nako’s opisina akong kuyog. Nag-sight seeing lang mi’ teks sa iyang mama.

“Kalooy ni papa!” tuaw ni Amparo sa hilom. Di lang siya gustong makasaksi kun mag-away iyang ginikanan. Gibuya man lang gud kono sila. Matud sa iyang mama. Apan bisan pa. Kasado sila. May gipanumpaan. Hilom lang si Amparo nga nag-ampo nga unta, di siya maliwat sa iyang mama. Hinoon, gihigugma man niya  iyang pamanhunon. (Katapusan)\