Ang sulat ni Digno

Nganong kini may gipili nimong isulat?” ni Mrs. Maria Anoos ngadto sa iyang grade five pupil nga  si Digno Egang. Niduol ang bata sa maestra tungod sa iyang lamesa sentro sa lawak saringan.  Sa language subject ni Mrs. Anoos, gipasulat niya ang mga pupils, ngadto sa usa  ka inilang bantogang tawo nga ilang napilian. Si Pope Benedict XVI ang gisulat ni Digno. Tulukibon ang nasulat niya. Nagkanayon iyang sulat:

“Dear Pope Benedict XVI, nagduda ko nga dili panglawas ang hinungdan sa imong pagluwat sa katungdanan. Si Pope John Paul II dakong masakiton. Apan nagpakamatay siya sa katungdanan. Sulod sa 600 ka tuig, karon pa ni nahitabo nga buhi ang Santo Papa nga nibiya sa puwesto. Duna gyu’y bug-at nga hinungdan nganong nibiya ka. Di lang nimo gustong ibutyag.

“Nakadungog ko’g tabitabi nga duna kay itul-id nga hiwi nga pamaagi sa simbahan. Unya nisupak nimo ang mga Cardinals. Mopasupot unta ka’g pamahayag pagpasabot sa mga tawo nga ang unod sa Bibliya, dili tanan pulong sa Diyos. Imo unta ning ipamahayag kay mao may tinood. Ug ang tinood mao may maghatag og kagawasan, sumala pa ni Jesucristo.

“Dapat mosulti gyud ka’s tinuod. Aron may kagawasan ka sa kagubot sa hunahuna. Palihog sulati ko kun unsay tinuod nga hinungdan sa imong pagluwat sa katungdanan.”

Gikulbaan ug nakapanglab-ok og laway si Digno pagkadungog niyas pangutana sa maestra. Abi niya’g nasuko si Mrs. Anoos niya. Apan naningkamot siyang motubag sa pangutana.

“Daghan mang sayop kaniadto ang Simbahang Katoliko maam. Usa ana, nagtoo sila nga ang Adlaw nagtuyok sa Kalibutan. Dihang si Galileo niingon nga ang Kalibutan lingin ug maoy nagtuyok sa Adlaw, ilang gipapriso si Galileo” ni Digno.

“Karon, unsa pa may sayop sa simbahan?” ni Mrs. Anoos.

“Kanang pagbasa sa Bibliya ini’g misa. Ang magbasa moingon ‘kintulo gikan sa sulat ni Pablo sa taga-Roma’. Unya inig huma’g basa, moingon ‘Ang pulong sa Diyos’. Ang pulong ni Pablo pulong na sab diay sa Diyos? Si Pablo ug ang Diyos usa ra diay?” ni Digno.

Nahingangha si Mrs. Anoos. Wa siya nagdahum nga sa kalinghod pa sa pangisip ni Digno, nakapangutana’g ingon niini. Wa siya’y ikatubag sa bata. Ikunsulta nalang unya niya’g pari ang pangutana ni Digno.

Gitan-aw niya ang mga klasmet ni Digno. Nagduko la’g suwat.  Si Digno ang pinakaunang nahuman og suwat. Ug pinakaunang nisumiter sa iyang gisuwat, sa maestra.

“Balik la’g lingkod. Ayaw lang istorboha imong mga klasmet” ni Mrs. Anoos. Gibutang ibabaw sa lamesa ang sinulat ni Digno.

“Yes, ma’am” ni Digno. Nitalikod. Nilakang palayo sa atubangan sa lamesa sa maestra. Pag-abot nia’s iyang lingkuranan nga nahimutang sa third row ug ikatulo gikan sa atubangan, nilingkod siya.

Nakapahinuktok ni Mrs. Anoos ang mga pangutana ni Digno. May ponto siya. (Kataposan)