Molutaw sa hangin

Dear Tita Salie,

Maayong adlaw. Hinaut nga malipayon ka sa imong kinabuhi ug labina sa imong trabaho nga mao ang paghatag og katin-awan sa mga tawo nga dunay kalibog sa suliran.

Nalipay gyod ko sa imong column kay at least duna mi kapangayoan og tambag sa among mga gihambin nga suliran. Daghan usab ko’g makuha nga mga pagtulon-an gikan nimo kun unsaon pagpadagan ang kinabuhi labina sa paghimo og hukom alang sa kinabuhi.

Tagoa lang ko sa ngalan nga Mr. H, 18 years old. Nagtrabaho ko karon Tita, sa usa lang ka ordinary nga trabaho. Ang importante lang nga nakatabang ko sa akong mga parents kay lisod man kaayo ang among panginabuhi.

Ang akong problema, Tita, mahitungod kini sa akong lovelife. Duna koy hinigugma kaniadto apan akong gibulagan tungod kay ako mang nahibaw-an nga duna siya’y lain nga gikabuangan. Ug karon kining akong amo dunay pag-umangkon nga hilabihan ka gwapa. Naibog gyod ko niya, Tita, ug buotan pa gyod kaayo. Makulbaan dayon ko kun ako siyang makit-an. Unya mora ko og molutaw sa hangin kun motan-aw siya kanako. Unsa man kining akong gibati kaniya, Tita, gugma na gyod kini? Palihug pasabta ko ug sultihi ko kun unsay akong buhaton. Daghang salamat sa imong pagtagad.

* * *

Hello, Mr. H,

Sa imong tampo karon ako na hinuon nga nahinumdoman ang akong kabatan-on. Dihang makita nako ang akong crush ug motan-aw ko mora og wala ko magtunob sa sawog. Apan karon sa akong pangedaron dili ko na masinati ang maong feelings. Busa nakaseguro ko nga ang imong na-feel karon hinay-hinay ra kana nga mawagtang bisan pa man kun imong ikadayon ang maong babaye.

Tungod kay mawagtang ra ang maong feeling nakaseguro ko nga dili kana mao ang love nga imong giingon. Kay ang gugma magpabilin hangtod sa hangtod. Mawagtang man ang kilig feeling apan ang gugma magpabilin.

Crush lang gyod nimo ang maong babaye, ug dako kaayo ka og gusto kaniya. Ug tungod kay duna kay gusto kaniya kulbaan gyod, mangluspad ka, maratol ka, mao kini ang mamahimo nimong reaction everytime nga makit-an nimo siya, everytime nga imo siyang makit-an nga mitan-aw siya nimo. Apan dili pa kini mao ang ilang giingon  nga gugma.

Ang tinuod nga gugma andam ma-protect kanimo bisan kun ang iya pang kinabuhi ang nakatahan niini. Ang  imong gibati karon posibleng mamahimong sinugdan sa matuod nga gugma kun imo kining alagaan. Natural ra ang imong na-feel kay batan-on ka pa. -- Tita Salie