Ang Singer

Gula 2

Naapil g’yud si Jane sa walo ka contestants nga mokanta sa usa ka oras nga radio amateur hour inigka-ugma, Domingo.

“Pasalamat g’yud kaayo ko Redem nga naapil ko sa makakanta ugma. Ang problema na lang nako mao ang pagdaug,” giingnan ni Jane ang radio technician nga miasistir kanila sa awdisyon. Mipahiyom lang si Redem nga mitutok sa dalaga.

“Mora’g bana-bana nako Jane dili ka mabentahaan sa mga kauban mo nga contestant, ayaw lang g’yud kompyansa kay pinalubad-lubad ra ba nang tingog ni Whitney Houston,” matud ni Redem nga mihatag og pagdasig ni Jane.

Gisundan ni Redem og tan-aw si Jane dihang mibiya na kini sa radio station. Sa hilom nakadayeg si Redem sa kaanyag ni Jane. Bisan og wala pa gani kini mangarte sa kaugalingon apan milutaw na ang iyang kaanyag.

Pagka-ugma, sayo nga gimontar ni Redem ang mga technical equipment didto sa stage sa Plaza Independencia aron masukod niya ang kakusog sa kahimanan. Samtang nag-testing si Redem sa angay nga tingog sa mga speakers, napugwat siya kay may mikalit pagguho sa iyang luyo.

“Hi Redem!” matud ni Jane nga mikalit lang pagtunga sa luyo ni Redem nga nagpahiyom. “Wow, kagwapa nimo Jane nianang imong gisul-ob!” wala gayud magduha-duha si Redem sa iyang pagdayeg.

Daan pa g’yud si Redem nga kun mangarte na sa kaugalingon si Jane dili mabentahaan ang iyang kaanyag. Karon nagbutang na kini og make-up sa iyang duha ka aping ug gamay’ng lipstick milutaw na gayud ang iyang kaanyag.

“Nganong nagngisi ka man nga nagtutok nako Redem?” matud ni Jane nga ingon sa nauwaw nga gisigihan siya’g tan-aw sa radio technician. “Kuan man gud, nahinumdom ko sa giingon sa akong mama nga kun mangita kuno ko’g pangasaw-onon kanang gwapa g’yud,” ni Redem pa.

Nangatawa silang duha. “Sige, good luck Jane sa imong pagkanta unya ug akong iampo nga ikaw ang modaug,” matud ni Redem. Taud-taud nangabot na ang ubang contestants. Diha na usab si Emil nga maoy producer sa radio amateur hour.

“Dugay ka na nga nagtrabaho sa radio station Redem?” gipangutana ni Jane ang radio technician. “Mga upat ka tuig na ko nga nagtrabaho dinhi Jane. Yuna, ikaw nagtrabaho ka na ba?” bawos-pangutana ni Redem sa dalaga.

“Gusto lagi unta ko nga makatrabaho dinhi sa siyudad apan lisud tingali kyn wala kay lig-on nga bakir,” ni Jane. Misinyas na si Emil nga sugdan na ang amateur hour. Daghan na ang mga tawo nga nagpaabot nga kasugdan ang indigay sa awit. – Sumpayan